قازاقستاندا مىندەتتى زەينەتاقى جيناقتارىنىڭ ساقتالۋىنا مەملەكەتتىك كەپىلدىك 2027 جىلدان باستاپ كۇشىن جويمايدى. وزگەرىستەر تەك ءبىر وتەماقى تولەمىنىڭ تەتىگىنە قاتىستى بولادى، دەپ حابارلايدى infohub.kz سايتى.
ق ر ەڭبەك جانە حالىقتى الەۋمەتتىك قورعاۋ مينيسترلىگى مىندەتتى زەينەتاقى جارنالارىنىڭ ساقتالۋىنا مەملەكەتتىك كەپىلدىك تولىق كولەمدە ساقتالىپ، الەۋمەتتىك كودەكستە بەكىتىلگەنىن اتاپ ءوتتى. ماسەلە – جيناقتاۋشى زەينەتاقى جۇيەسىنىڭ العاشقى كەزەڭىندە ەنگىزىلگەن وتەماقى ءتارتىبىن قايتا قاراۋ. ول كەزدە زەينەتاقى اكتيۆتەرىن تەك مەملەكەت باسقاردى، سوندىقتان ينۆەستيسيالىق كىرىستىلىك پەن ينفلياسيا دەڭگەيى اراسىنداعى ايىرمانى وتەۋ تەتىگى قاراستىرىلعان ەدى.
ەڭبەك مينيسترلىگىنىڭ تۇسىندىرۋىنشە، وزگەرىستەر زەينەتاقى جۇيەسىنىڭ دامۋىمەن جانە ازاماتتاردىڭ جيناقتارىن ءوز بەتىنشە باسقارۋ مۇمكىندىكتەرىنىڭ كەڭەيۋىمەن بايلانىستى. قازىرگى ۋاقىتتا سالىمشىلار زەينەتاقى جيناقتارىنىڭ 100 پايىزىنا دەيىن جەكە باسقارۋشى كومپانيالارعا سەنىمگەرلىك باسقارۋعا بەرە الادى. بۇرىن بۇل كورسەتكىش 50 پايىزدى قۇرايتىن. ۆەدومستۆونىڭ اتاپ وتۋىنشە، باسقارۋشى كومپانيانى، ينۆەستيسيالىق ستراتەگيانى جانە تاۋەكەل دەڭگەيىن ءوز بەتىنشە تاڭداۋ مۇمكىندىگى سالىمشىلاردىڭ ينۆەستيسيالىق شەشىمدەردى وزدەرى قابىلدايتىنىن بىلدىرەدى. وسىعان بايلانىستى وتەماقى تولەمدەرىنىڭ تەتىگى زەينەتاقى اكتيۆتەرىن باسقارۋدىڭ جاڭا مودەلىنە سايكەستەندىرىلۋدە.
بۇل رەتتە مەملەكەت زەينەتاقى جيناقتارىن قورعاۋدىڭ قولدانىستاعى تەتىكتەرىن ساقتايدى. ۇلتتىق بانك زەينەتاقى اكتيۆتەرىن باسقارۋدى جالعاستىرادى، ولاردىڭ ساقتالۋىنا جانە ۇزاق مەرزىمدى پەرسپەكتيۆادا ينفلياسيادان جوعارى كىرىستىلىككە قول جەتكىزۋگە باعىتتالادى. جەكە باسقارۋشى كومپانيالار ءۇشىن زاڭنامادا قارجىلىق تۇراقتىلىققا، مەنشىكتى كاپيتال مولشەرىنە جانە كاسىبي بىلىكتىلىككە قويىلاتىن تالاپتار قاراستىرىلعان. سونىمەن قاتار، ەگەر باسقارۋشى بەلگىلەنگەن ەڭ تومەنگى كىرىستىلىك دەڭگەيىن قامتاماسىز ەتپەسە، ول ايىرمانى ءوز قاراجاتى ەسەبىنەن وتەۋگە مىندەتتى.
مينيسترلىك وزگەرىستەر جيناقتاۋشى زەينەتاقى جۇيەسىن جەتىلدىرۋگە، باسقارۋشى كومپانيالاردىڭ جاۋاپكەرشىلىگىن ارتتىرۋعا جانە ازاماتتاردىڭ مۇمكىندىكتەرىن كەڭەيتۋگە باعىتتالعانىن، مىندەتتى زەينەتاقى جيناقتارىنىڭ ساقتالۋىنا مەملەكەتتىك كەپىلدىككە اسەر ەتپەيتىنىن اتاپ ءوتتى.