پەرۋدەگى ايگىلى ناسكا سىزىقتارى ماڭىندا بولعان ۇشاق اپاتى سالدارىنان 13 ادام قازا تاپتى. بۇل تۋرالى جەرگىلىكتى بيلىك حابارلادى. وقيعا سەنبى كۇنى ناسكا قالاسىنىڭ سىرتىنداعى ەگىستىك القاپتا بولعان. ۇشاقتا تۋريستەر بولعان.
ناسكا مۋنيسيپاليتەتىنىڭ Facebook-تەگى مالىمدەمەسىنشە، ۇشاق تۋريستەردى ناسكا سىزىقتارىنا اۋە ەكسكۋرسياسىنا اپارعان. ناسكا سىزىقتارى — بۇل جۇزدەگەن جىل بۇرىن پەرۋدىڭ بايىرعى تۇرعىندارى ءشول دالاعا سالعان الىپ گەوگليفتەر. بۇل سىزىقتار جانۋارلاردىڭ بەينەلەرىن قۇرايدى، ولاردى تەك ۇشاقتان نەمەسە ارنايى مۇنارالاردان تولىق كورۋگە بولادى.
ناسكا بيلىگىنىڭ حابارلاۋىنشا، ۇشاق جاقىن ماڭداعى يكا قالاسىنان ۇشىپ شىققان جانە ونى پەرۋلىك Aerodiana كومپانياسى باسقارعان. اۋەكومپانيانىڭ سايتىندا ولاردىڭ 14 جىل بويى Cessna Grand Caravan ۇشاقتارىمەن ناسكا سىزىقتارىنا اۋە تۋرلار ۇيىمداستىرىپ كەلە جاتقانى كورسەتىلگەن. پەرۋدىڭ ساۋدا جانە تۋريزم مينيسترلىگىنىڭ مالىمدەمەسىندە ۇشاقتا 11 شەتەلدىك تۋريست جانە ەكى ەكيپاج مۇشەسى بولعانى ايتىلعان. مەملەكەتتىك Agencia Andina اگەنتتىگىنىڭ حابارلاۋىنشا، ۇشاقتا ەكى نەمىس، ەكى يسپان جانە جەتى يتاليالىق تۋريست بولعان.
پەرۋ بيلىگى اپاتتىڭ سەبەبىن تەرگەپ جاتقانىن مالىمدەدى. Aerodiana كومپانياسى ازىرگە تۇسىنىكتەمە بەرگەن جوق.