پەرۋدىڭ وڭتۇستىگىندەگى اند تاۋلارىندا 6،7 بالدىق جەر سىلكىنىسى بولدى. بۇل تۋرالى اقش گەولوگيالىق قىزمەتى حابارلادى. العاشقى مالىمەتتەر بويىنشا، زارداپ شەككەندەر مەن قيراعان عيماراتتار جوق، دەپ حابارلايدى infohub.kz سايتى.
جەر سىلكىنىسى جەرگىلىكتى ۋاقىت بويىنشا ساعات 13:00-دە (گرينۆيچ بويىنشا 18:00) بولعان. وشاعى اياكۋچو ايماعىنىڭ پاريناكوچاس پروۆينسياسىنداعى ۋپاۋاچو قالاسىنان سولتۇستىك-باتىسقا قاراي 38 شاقىرىم جەردە، تەرەڭدىگى 66 شاقىرىمدا ورنالاسقان. ءدۇمپۋ پەرۋدىڭ بىرنەشە وڭتۇستىك ايماقتارىندا، سونىڭ ىشىندە يكا مەن ارەكيپادا سەزىلگەن.
ازاماتتىق قورعانىس باسقارماسىنىڭ باسشىسى لۋيس ۆاسكەس RPP راديوسىنا بەرگەن سۇحباتىندا «ازىرگە ەشقانداي زالال تۋرالى حابارلانعان جوق» دەدى. پاريناكوچاس پروۆينسياسىنىڭ اكىمى يوني رەيەس تە پروۆينسيا ورتالىعىندا زالال جوقتىعىن راستادى. پەرۋ اسكەري-تەڭىز كۇشتەرى سۋنامي ءقاۋپى جوقتىعىن مالىمدەدى.
پەرۋ — تىنىق مۇحيتىنىڭ «وتتى بەلدەۋىندە» ورنالاسقان، سەيسميكالىق بەلسەندىلىگى جوعارى ايماق. 2007 جىلى يكا ايماعىندا بولعان 7،9 بالدىق جەر سىلكىنىسى سالدارىنان 600-گە جۋىق ادام قازا تاپقان ەدى.