پەرۋدا بولعان ەكى جەر سىلكىنىسىنەن كەمىندە التى ادام قازا تاۋىپ، جيىرما ءبىر ادام جاراقات الدى. بۇل تۋرالى infohub.kz سايتى حابارلايدى.
سەنبى كۇنى كەشكە پەرۋ ۇلتتىق سەيسمولوگيالىق ورتالىعىنىڭ X الەۋمەتتىك جەلىسىندەگى مالىمەتىنشە، چۋپاكا پروۆينسياسىندا (حۋنين ايماعى) ماگنيتۋداسى 5،1 جانە 3،7 بولاتىن ەكى ءدۇمپۋ تىركەلگەن. بۇل ايماق استانا ليمادان شامامەن 300 شاقىرىم جەردە ورنالاسقان.
ورتالىقتىڭ حابارلاۋىنشا، ءبىرىنشى جەر سىلكىنىسى 24 شاقىرىم، ەكىنشىسى 18 شاقىرىم تەرەڭدىكتە بولعان.
بۇعان دەيىن ەۋروپا-جەرورتا تەڭىزى سەيسمولوگيالىق ورتالىعى ءبىرىنشى ءدۇمپۋدىڭ ماگنيتۋداسىن 5،6 دەپ كورسەتكەن ەدى.
پەرۋ ۇلتتىق ازاماتتىق قورعانىس ينستيتۋتىنىڭ باسشىسى لۋيس ۆاسكەس Exitosa دەگەن جەرگىلىكتى راديوستانسياعا بەرگەن سۇحباتىندا الدىن الا مالىمەتتەر بويىنشا 48 ءۇيدىڭ قيراعانىن، تاعى 18 ءۇيدىڭ زاقىمدانعانىن حابارلادى. زارداپ شەككەن 300-گە جۋىق ادامعا شاتىرلار بەرىلۋدە.
چۋپاكاداعى زارداپ شەككەن ەلدى مەكەندەردەگى ۇيلەر، نەگىزىنەن، سامان كىرپىشتەردەن سوعىلعان قاراپايىم قۇرىلىستار ەكەنى ايتىلادى.
ۆاسكەس جەدەل جاردەم توپتارى مەن ءورت سوندىرۋشىلەر جەكسەنبى كۇنى تاڭەرتەڭ زارداپ شەككەن ايماقتارعا جەتىپ، قوقىستاردى تازالاۋ جۇمىستارىن باستاعانىن، قوسىمشا قۇربانداردىڭ بولۋى مۇمكىن ەكەنىن جەتكىزدى.
پەرۋ تىنىق مۇحيتىنىڭ وتتى شەڭبەرى بويىندا ورنالاسقان. بۇل ايماق الەمدەگى سەيسميكالىق بەلسەندىلىكتىڭ شامامەن 85 پايىزىن قۇرايدى.