سولتۇستىك قازاقستان وبلىسىندا قۇرىلىس جۇمىستارى كەزىندە ەكى ادامنىڭ جانە ەجەلگى جانۋاردىڭ سۇيەكتەرى تابىلدى. سيرەك كەزدەسەتىن ولجا پەتروپاۆل ماڭىنداعى پريبرەجنوە اۋىلىنىڭ تۇبىنەن شىقتى، دەپ حابارلايدى infohub.kz سايتى.
جۇمىسشىلار سۇيەكتەرگە كوپىر سالۋ بارىسىندا تاپ بولدى. ەكسكاۆاتور قۇم كارەرىن قازىپ جاتقاندا، توپىراقتان سۇيەكتەر بايقالعان. ولجالاردى جەر بەتىنە شىعارىپ، وقيعا ورنىنا پوليسيا قىزمەتكەرلەرىن شاقىردى.
قۇقىق قورعاۋ ورگاندارى تەكسەرۋ جۇمىستارىن باستادى. الدىن الا مالىمەتتەر بويىنشا، قىلمىستىق سيپاتتاعى بەلگىلەر انىقتالماعان. الايدا ادام سۇيەكتەرى قاي كەزەڭگە جاتاتىنى ازىرگە بەلگىسىز.
تابىلعان سۇيەكتەردىڭ ءبىرىن تاريح عىلىمدارىنىڭ كانديداتى، ارحەولوگ اناتولي پلەشاكوۆ زەرتتەدى. الدىن الا بولجام بويىنشا، ول وسى اۋماقتا ءبىزدىڭ داۋىرىمىزگە دەيىنگى XII مىڭجىلدىققا دەيىن ءومىر سۇرگەن ءجۇندى ءمۇيىزتۇمسىققا تيەسىلى.
«ءجۇندى ءمۇيىزتۇمسىق — ءبىز ايتىپ جۇرگەندەي، مامونت فاۋناسى، ول پالەوليت ءداۋىرى، مۇزدىق كەزەڭ. ەگەر وسى باس سۇيەكتەردىڭ بىرەۋى سول كەزەڭگە جاتاتىن بولسا، بۇل اسقان سەنساسيا بولار ەدى. مامونت فاۋناسىنىڭ تابىلۋى سەنساسيا دەپ ايتىپ جۇرسەم، وندا بۇل اسقان سەنساسيا بولار ەدى. ويتكەنى باس سۇيەكتەردىڭ بىرەۋى قاتتى زاقىمدالعان، سوندىقتان بۇل وتە قىزىق»، — دەدى ارحەولوگ اناتولي پلەشاكوۆ.
ەندى عالىمدار ادام سۇيەكتەرىنىڭ جاسىن انىقتاۋى كەرەك. ماماندار تابىلعان سۇيەكتەردى جانە قۇم كارەرىنىڭ ءوزىن جان-جاقتى زەرتتەۋدى جوسپارلاپ وتىر.