پەتروپاۆلدا BMW كولىگىن تىزگىندەگەن جۇرگىزۋشى اۋەجاي اۋماعىندا دريفت جاساعانى ءۇشىن اكىمشىلىك جاۋاپكەرشىلىككە تارتىلدى. الايدا ول كىناسىن مويىندامادى، دەپ حابارلايدى infohub.kz سايتى.
سولتۇستىك قازاقستان وبلىسى سوتتارىنىڭ رەسمي Telegram-ارناسىندا جازىلعانداي، پەتروپاۆل قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتى جۇرگىزۋشىگە قاتىستى اكىمشىلىك ءىستى قارادى.
2026 جىلعى 27 قىركۇيەكتە شامامەن ساعات 18:00-دە ول « قىزىل-جار» اۋەجايىنىڭ اۋماعىندا BMW كولىگىن باسقارىپ، اينالاسىنداعىلارعا قۇرمەتسىزدىك تانىتىپ، قوعامدىق ءتارتىپ پەن ادامداردىڭ تىنىشتىعىن بۇزا وتىرىپ، باسقارىلاتىن سىرعۋ (دريفت) تاسىلىمەن بۇرىلىستاردى اينالعان.
جۇرگىزۋشى كىناسىن مويىنداماي، اۋەسقوي اۆتوسپورتتان كاسىبي دەڭگەيگە ءوتۋ ءۇشىن باسقارىلاتىن سىرعۋ تاسىلىمەن بۇرىلىستاردى اينالۋ داعدىسىن جەتىلدىرۋ ماقساتىندا اۋەجاي اۋماعىن پايدالانعانىن ءتۇسىندىردى. دريفت تۇسىرىلگەن بەينە ەستەتيكالىق تۇرعىدان ادەمى كورىنەدى دەپ ويلاپ، ونى Instagram-عا جاريالاعان.
ءىستى قاراۋ بارىسىندا سوت ەر ادامنىڭ ارەكەتتەرىنە جاسالعان قۇقىق بۇزۋشىلىقتىڭ سيپاتىن، ونىڭ جاسالۋ ءمان-جايلارىن جانە قولدانىستاعى زاڭناما تالاپتارىن ەسكەرە وتىرىپ، قۇقىقتىق باعا بەردى.
ءىستى قاراۋ قورىتىندىسى بويىنشا سوت جۇرگىزۋشىنى ق ر اقبتك-نىڭ 434-بابىنىڭ 1-بولىگىندە كوزدەلگەن اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىدى جانە وعان 15 تاۋلىككە قاماۋ تۇرىندەگى جازا تاعايىندادى.
سوت قاۋلىسى زاڭدى كۇشىنە ەنگەن جوق.