پەتروپاۆلدا 51 جاستاعى پاسيەنت پەن دارىگەر اراسىنداعى جانجال مەديسينا قىزمەتكەرىنە زورلىق-زومبىلىق قولدانعانى ءۇشىن قىلمىستىق ءىس قوزعاۋمەن اياقتالدى، دەپ حابارلايدى infohub.kz سايتى.
سولتۇستىك قازاقستان وبلىسى پوليسيا دەپارتامەنتىنىڭ رەسمي Telegram-ارناسىندا حابارلانعانداي، ەمحانا دالىزىندە دارىگەر مەن پاسيەنت اراسىنداعى شيەلەنىستى اڭگىمە قول كوتەرۋگە ۇلاسقان. تاڭەرتەڭ 17 تامىزدا قالا تۇرعىنى قابىلداۋعا كەلىپ، دارىگەرمەن سويلەسە باستاعان، اڭگىمە وتكىر تۇردە وتكەن.
«پوليسياعا تۇسكەن ارىز بويىنشا، ەر ادام مەديسينا قىزمەتكەرىنىڭ ەسكەرتۋىنە اگرەسسيۆتى جاۋاپ بەرىپ، ونىڭ بەتىنە سوققى جاساعان»، — دەدى سقو پد.
پوليسەيلەر مەديسينا قىزمەتكەرىنە ونىڭ قىزمەتتىك مىندەتىن اتقارۋ كەزىندە ومىرىنە نەمەسە دەنساۋلىعىنا ءقاۋىپ توندىرمەيتىن زورلىق-زومبىلىق قولدانۋ فاكتىسى بويىنشا قىلمىستىق ءىس قوزعادى.
«بۇل — ايماقتا تىركەلگەن مەديسينا قىزمەتكەرىنە زورلىق-زومبىلىق قولدانۋدىڭ ەكىنشى جاعدايى. ماۋسىم ايىندا شال اقىن اۋدانىندا ماس كۇيىندەگى ەر ادام جول-كولىك وقيعاسىنان كەيىن وعان كومەك كورسەتكەن مەدبيكەگە سوققى جاساعان. سوت ونى 1،5 جىلعا باس بوستاندىعىنان ايىرۋعا سوتتادى»، — دەپ اتاپ ءوتتى سقو پد باستىعىنىڭ ءبىرىنشى ورىنباسارى الىبەك قۋزاحمەتوۆ.