استانا جاعىنان پەتروپاۆلعا كىرە بەرىستە ارتىق جۇكتەلگەن اۋىر جۇك كولىكتەرىنىڭ كەزەگى ءتۇزىلدى. سالماق باقىلاۋىنان جانە جاۋاپكەرشىلىكتەن قۇتىلۋ ءۇشىن جۇرگىزۋشىلەر ءوز كولىكتەرىن جول جيەگىنە تاستاپ، ءىز-تۇزسىز كەتتى، دەپ infohub.kz سايتى حابارلايدى.
سولتۇستىك قازاقستان وبلىسى جولاۋشىلار كولىگى جانە اۆتوموبيل جولدارى باسقارماسىنىڭ حابارلاۋىنشا، بۇل جاعداي اۆتوموبيل جولدارىن ساقتاۋ جانە ءقاۋىپسىز قوزعالىستى قامتاماسىز ەتۋگە باعىتتالعان «جول قاۋىپسىزدىگى» پروفيلاكتيكالىق ءىس-شارالارى كەزىندە ورىن العان.
باسقارما باسشىسى ەردەن شورتىباەۆتىڭ ايتۋىنشا، ارتىق جۇكتەلگەن كولىكتەردىڭ جۇرگىزۋشىلەرى سالماق باقىلاۋىنان جالتارۋعا تىرىسىپ، ءوز كولىكتەرىن تاستاپ كەتكەن.
«اتالعان كولىكتەردىڭ جۇرگىزۋشىلەرى ارتىق جۇك سالدارىنان ولشەۋدەن جالتارۋ ءۇشىن كولىكتەرىن تاستاپ كەتتى. قازىرگى تاڭدا ولار ەكى كۇن بويى جوق. بارلىق كولىك قۇرالدارىنىڭ دەرەكتەرى انىقتالدى»، — دەدى ەردەن شورتىبايەۆ.
باستاپقىدا 28 اۋىر جۇك كولىگى تۋرالى ايتىلعان بولاتىن، الايدا كەيىن سولتۇستىك قازاقستان وبلىسى پوليسيا دەپارتامەنتى 32 كولىك قۇرالى ەكەنىن ناقتىلادى.
يەلەرى ەكى كۇن بويى كولىكتەرىن الىپ كەتپەگەندىكتەن، ماسەلەنى شەشۋگە پوليسيا قىزمەتكەرلەرى جۇمىلدىرىلدى. ۆەدومستۆونىڭ مالىمەتىنشە، 19 شىلدە ساعات 14:30-داعى جاعداي بويىنشا احۋال تولىق رەتتەلگەن.
پروفيلاكتيكالىق اڭگىمەلەردەن كەيىن بارلىق 32 اۋىر جۇك كولىگى سالماق باقىلاۋ پۋنكتىنە بارىپ، ولشەۋ راسىمىنەن ءوتىپ، ءوز باعىتتارى بويىنشا ءجۇرىپ كەتتى. بارلىق جۇرگىزۋشىلەرگە قاتىستى ۋاكىلەتتى مەملەكەتتىك ورگاندار قازاقستان رەسپۋبليكاسىنىڭ زاڭناماسىنا سايكەس شارالار قابىلدادى.
باسقارما ارتىق جۇكتەلگەن جۇك كولىكتەرى اسىرەسە ىستىق اۋا رايىندا جول توسەمىنە ەلەۋلى زيان كەلتىرەتىنىن ەسكە سالادى. ولاردىڭ سالماعىنان جاڭا اسفالتتا ويىق پايدا بولادى، بۇل جولداردىڭ قىزمەت ەتۋ مەرزىمىن قىسقارتىپ، ولاردى جوندەۋ شىعىندارىن ارتتىرادى.
جۇرگىزىلگەن ولشەۋلەر قورىتىندىسى بويىنشا ماماندار رەسپۋبليكالىق اۆتوموبيل جولىنا كەلتىرىلگەن ماتەريالدىق زالالدى وتەۋ تۋرالى تالاپ-ارىزبەن سوتقا جۇگىنۋدى جوسپارلاپ وتىر.