سولتۇستىك قازاقستان وبلىسىندا قاتتى تۇرمىستىق قالدىقتار پوليگونىنىڭ ارعى جاعىندا، شاحوۆسكوە اۋىلىنىڭ ماڭىندا قۋراي ورتەندى. الدىن الا مالىمەتتەرگە قاراعاندا، ءورت شامامەن 6 گەكتار اۋماقتى شارپىعان. بۇل تۋرالى وبلىستىق توتەنشە جاعدايلار دەپارتامەنتى حابارلادى، دەپ جازادى infohub.kz سايتى.
ءبىر ۋچاسكەدە ءورت سوندىرۋشىلەر جالىندى اۋىزدىقتاپ ۇلگەردى. تاعى ەكى ۋچاسكەدە ءسوندىرۋ جۇمىستارى جالعاسىپ جاتىر.
ءورتتى سوندىرۋگە سولتۇستىك قازاقستان وبلىسى تجد-نىڭ 110 قىزمەتكەرى مەن 31 تەحنيكا بىرلىگى جۇمىلدىرىلدى. وقيعا ورنىندا جەدەل شتاب قۇرىلىپ، ءتورت جاۋىنگەرلىك ۋچاسكە اشىلدى.
سونىمەن قاتار سوندىرۋگە تەمىرجول كاسىپورنىنىڭ ءورت پويىزى تارتىلدى.
تجد وكىلدەرى ءورتتىڭ تارالۋىنا قاتتى جەل ىقپال ەتىپ وتىرعانىن اتاپ ءوتتى. نەگىزگى كۇش ءورتتى تەجەۋگە جانە جاقىن ماڭداعى ەلدى مەكەندەر مەن نىسانداردى قورعاۋعا باعىتتالعان.
HALYQSTAN Telegram-ارناسىنىڭ دەرەگىنشە، ورتتەن شىققان قويۋ ءتۇتىن پەتروپاۆلعا جەتكەن، تۇرعىندار كۇيىك يىسىنە جانە كورىنۋدىڭ ناشارلاۋىنا شاعىمدانىپ وتىر.
احۋال سولتۇستىك قازاقستان وبلىسى تجد-نىڭ باقىلاۋىندا.
بۇعان دەيىن «كۋرسيۆ» الماتى وبلىسىندا ۇزىناعاش اۋىلىنىڭ ماڭىنداعى جۇمىس ىستەپ تۇرعان قاتتى تۇرمىستىق قالدىقتار پوليگونىنداعى ءورتتىڭ اۋىزدىقتالعانىن جازعان بولاتىن. جالىن 500 شارشى مەتر اۋماققا تارالىپ، سوندىرۋگە 33 ادام مەن 22 تەحنيكا بىرلىگى جۇمىلدىرىلعان.