پەتروپاۆلدا جەدەل ارەكەت ەتۋ ارنايى جاساعىنىڭ (سوبر) بويسىلارى قولىندا اقشا شوعىرى بار 57 جاستاعى ەر ادامدى دەر كەزىندە بايقاپ، الاياقتارعا 1،1 ملن تەڭگە اۋدارۋىنا جول بەرمەدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىنىڭ مالىمەتىنشە، سولتۇستىك قازاقستان وبلىسى پوليسيا دەپارتامەنتىنىڭ ارنايى جەدەل ارەكەت ەتۋ جاساعىنىڭ وفيسەرلەرى ساۋدا ۇيلەرىندە تۇراقتى تۇردە قىزمەت اتقارادى — تاڭعى 9:00-دەن جابىلعانعا دەيىن. ءبىر قىزمەتكەر نىساندا قوعامدىق ءتارتىپتى قورعاسا، ەكىنشىسى ازاماتتىق كيىمدە ينتەرنەت-الاياقتىقتىڭ الدىن الۋعا باعىتتالعان.
وسىلايشا، قاراساي بوتپايەۆ پەن باۋىرجان احمەت ساۋدا ۇيلەرىنىڭ بىرىندە كەزەكشىلىك ەتتى. قاراساي بانكومات جانىندا اقشا شوعىرىن ۇستاپ، تولقىپ تەلەفونمەن سويلەسىپ تۇرعان ەر ادامعا كوڭىل ءبولدى. پوليسەي قىزمەتتىك كۋالىگىن كورسەتىپ، ءوزىن تانىستىردى. الدىمەن قالا تۇرعىنى وعان سەنگىسى كەلمەدى، سوندىقتان نىساندى كيىمدەگى ارىپتەسىن شاقىرۋعا تۋرا كەلدى. سودان كەيىن بارىپ ەر ادام ءتارتىپ ساقشىلارىنا قۇلاق استى.
ول Binance-تە كريپتوۆاليۋتا ساۋدالايتىنىن ايتتى، الايدا پوليسەيلەردىڭ Binance دەگەن نە دەگەن سۇراعىنا جاۋاپ بەرە المادى. جۋىردا ول ينتەرنەتتەن تابىس تابۋ تۋرالى حابارلاندىرۋدى كورىپ، Telegram-دا كورسەتىلگەن نومىرگە جازىپ، كريپتوۆاليۋتادان «تابىس تابۋ» ۇسىنىسىن العانى انىقتالدى. حابارلاندىرۋدىڭ ارتىندا تۇرعان الاياقتار ەر ادامعا سالىمداردىڭ «تابىستىلىق گرافيكتەرىن» جىبەرىپ وتىرعان.
ارينە، ولاردىڭ ناقتى كريپتوۆاليۋتا بيرجاسىنا ەشقانداي قاتىسى بولماعان، الايدا ەر ادام قىلمىسكەرلەرگە ءوزى ءۇشىن ايتارلىقتاي سومانى اۋدارۋعا دايىن بولدى. پوليسەيلەردىڭ قىراعىلىعىنىڭ ارقاسىندا شىعىن كەلتىرىلمەدى.