پەتروپاۆلدا ارنايى جىلدام ارەكەت ەتۋ جاساعىنىڭ (سوبر) قىزمەتكەرلەرى 57 جاستاعى قالا تۇرعىنىنىڭ الاياقتارعا 1،1 ملن تەڭگە اۋدارۋىنا جول بەرمەدى. ول بۇل قاراجاتتى كريپتوۆاليۋتاعا ينۆەستيسيا رەتىندە جىبەرمەك بولعان، دەپ حابارلايدى infohub.kz سايتى.
Polisia.kz مالىمەتىنشە، سولتۇستىك قازاقستان وبلىسى پوليسيا دەپارتامەنتىنىڭ سوبر قىزمەتكەرلەرى قاراساي بوتپايەۆ پەن باۋىرجان احمەت «راحمەت» ساۋدا ۇيىندە كەزەكشىلىك اتقارعان. بوتپايەۆ بانكومات جانىنداعى ەر ادامعا نازار اۋداردى: ول قولىندا اقشا ۇستاپ، تولقىپ تەلەفونمەن سويلەسىپ تۇرعان.
پوليسەي ءوزىن تانىستىرىپ، قىزمەتتىك كۋالىگىن كورسەتتى، ءبىراق ازامات وعان بىردەن سەنبەدى. سوندا بوتپايەۆ فورما كيگەن ارىپتەسىن شاقىردى — سودان كەيىن عانا قالا تۇرعىنى پوليسەيلەرگە قۇلاق تۇرە باستادى.
ەر ادام Binance پلاتفورماسىندا كريپتوۆاليۋتا ساۋدالايتىنىن ايتتى، ءبىراق بۇل قانداي پلاتفورما ەكەنىن تۇسىندىرە المادى. ول ينتەرنەتتەن تابىس تابۋ تۋرالى حابارلاندىرۋ كورىپ، Telegram-داعى كورسەتىلگەن بايلانىسقا جازعانى انىقتالدى. اڭگىمەلەسۋشىلەر وعان كريپتوۆاليۋتادان تابىس تابۋدى ۇسىنىپ، بولجامدى كىرىس گرافيكتەرىن جىبەرىپ وتىرعان.
پوليسيا دەرەگىنشە، بۇل ادامداردىڭ ناقتى كريپتوۆاليۋتا بيرجاسىنا قاتىسى بولماعان. ەر ادام ولارعا اقشا اۋدارۋعا دايىن بولعان، الايدا سوبر قىزمەتكەرلەرى ونى توقتاتتى. زيان كەلتىرىلگەن جوق.
وبلىستاعى ساۋدا ۇيلەرىندە مۇنداي كەزەكشىلىكتەر تۇراقتى تۇردە وتكىزىلەدى — تاڭعى 9:00-دەن جابىلعانعا دەيىن. ءبىر قىزمەتكەر فورمادا قوعامدىق ءتارتىپتى قاداعالايدى، ەكىنشىسى ازاماتتىق كيىمدە ءجۇرىپ، ينتەرنەت-الاياقتىقتىڭ الدىن الۋمەن اينالىسادى.
پوليسيا وڭاي تابىس ۋادەلەرىنە سەنبەۋگە جانە ءوزى تۇسىنبەيتىن قۇرالدارعا، اسىرەسە بەيتانىس ادامداردىڭ نۇسقاۋىمەن اقشا سالماۋعا شاقىردى.
سونداي-اق ۆەدومستۆو تۋىستارىنىڭ اتىنان كەلەتىن بەينەقوڭىراۋلار تۋرالى ەسكەرتتى. بوتپاەۆتىڭ تاجىريبەسىندە الاياقتار ينتەرنەتتە جاريالانعان فوتوسۋرەتتەردى پايدالانىپ، نەيروجەلىلەر ارقىلى كەلبەتىن وزگەرتكەن جاعدايلار بولعان.
ەگەر جاقىن ادام بەينەقوڭىراۋ كەزىندە اقشا اۋدارۋدى سۇراسا، پوليسەيلەر ونىڭ جەكە باسىن تەكسەرۋدى ۇسىنادى: بوگدە ادامدار بىلمەيتىن سۇراقتار قويۋ كەرەك. قارجىعا قاتىستى كەز كەلگەن مالىمەتتى رەسمي ارنالار ارقىلى تەكسەرۋ قاجەت. الاياقتىق بەلگىلەرى بايقالسا، دەرەۋ پوليسياعا حابارلاسۋ كەرەك.
بۇعان دەيىن «كۋرسيۆ» مۇعالىمدەر كۇنى قارساڭىندا الاياقتار قازاقستاندىقتاردى پەداگوگتەرگە ارنالعان سىيلىق جيناقتارىن ۇسىنىپ، فيشينگتىك سايتتارعا تارتقانىن جازعان. باس پروكۋراتۋرانىڭ قۇقىقتىق ستاتيستيكا كوميتەتىنىڭ دەرەگىنشە، ولار الداۋ ءۇشىن جي كومەگىمەن جاسالعان جوق تاۋارلاردىڭ سۋرەتتەرىن جانە ساتۋشىلاردى يميتاسيالايتىن چات-بوتتاردى پايدالانادى.