پەتروپاۆلدا سوت بىرنەشە جۇك كولىگىنىڭ يەسىن رەسپۋبليكالىق تراسسانىڭ بويىنداعى تەحنيكانى الىپ كەتۋ تۋرالى پوليسيانىڭ زاڭدى تالابىن ورىنداماعانى ءۇشىن اكىمشىلىك قاماۋعا الدى، — دەپ حابارلايدى infohub.kz سايتى.
جۇك كولىكتەرى ۇزاق ۋاقىت بويى استانا – كوكشەتاۋ اۆتوموبيل جولىنىڭ 479–480 شاقىرىمىندا، پەتروپاۆل اۋەجايىنا بۇرىلىستىڭ جانىندا تۇرعان. اۋىر تەحنيكا سالدارىنان جول توسەمىندە ويىس پايدا بولعان.
يەسى كىلتتەرى جوق، جۇرگىزۋشىلەرمەن بايلانىسا الماعاندىقتان جانە كولىكتەردىڭ اقاۋلىعىنان ماشينالاردى الىپ كەتە الماعانىن ايتقان. الايدا سوت بۇل دالەلدەردى نەگىزسىز دەپ تاپتى، ويتكەنى ولار وبەكتيۆتى دالەلدەرمەن راستالماعان. مەنشىك يەسى كەدەرگىلەردى جويۋ، سونىڭ ىشىندە اقاۋلى تەحنيكانى جوندەۋدى ۇيىمداستىرۋ بويىنشا دەر كەزىندە شارا قولدانۋعا مىندەتتى.
سوت شەشىم شىعارعاندا ەر ادامنىڭ بۇعان دەيىن دە اۋىر سالماقتى كولىكتەردى پايدالانۋعا بايلانىستى بۇزۋشىلىقتار ءۇشىن بىرنەشە رەت اكىمشىلىك جاۋاپكەرشىلىككە تارتىلعانىن ەسكەردى. ناتيجەسىندە ول پوليسيا قىزمەتكەرىنىڭ زاڭدى تالابىنا باعىنباعانى ءۇشىن كىنالى دەپ تانىلىپ، 10 تاۋلىككە اكىمشىلىك قاماۋعا الىندى.
سوت قاۋلىسى ءالى زاڭدى كۇشىنە ەنگەن جوق.