امەريكانىڭ ميلۋوكي قالاسىنداعى گالەرەيادان ۇرلانعان پابلو پيكاسسونىڭ تۋىندىسى سەگىز جىلدان كەيىن تابىلدى. وفورت وسى ۋاقىت بويى پاتەردەگى قابىرعادا ءىلۋلى تۇرعان، قالىڭ شاڭ باسقان، دەپ حابارلايدى infohub.kz.
ماسەلە پيكاسسو 1949 جىلى جاساعان «تورەرو» وفورتى تۋرالى بولىپ وتىر. جۇمىس كۇرىش قاعازىندا ورىندالعان، رامكاعا سالىنعان جانە سۋرەتشىنىڭ قولى قويىلعان. مۇنداي دانادان بارلىعى 30-اق بار.
ۇرلىققا دەيىن وفورتتىڭ قۇنى 35–50 مىڭ دوللار (16–23 ملن تەڭگە) دەپ باعالانعان. 2018 جىلى جۇمىس ميلۋوكيدەگى بيلل دەليند گالەرەياسىنان جوعالىپ كەتكەن ەدى، وسى ۋاقىت بويى ونىڭ قايدا ەكەنى بەلگىسىز بولدى.
وتكەن اپتادا پوليسيا دەليندتى تابىلعان جۇمىستى تانۋعا كەلۋىن ءوتىندى. ول بىردەن بۇل سول وفورت ەكەنىن ءتۇسىندى.
«مەن تاڭعالدىم. ءسوزىمدى تابا المادىم. بۇل مەن ءۇشىن كەرەمەت ءسات بولدى»، — دەدى دەليند.
قوسىمشا راستاۋ رەتىندە رامكانىڭ ارتقى جاعىنداعى جاپسىرما بولدى. وندا DeLind Fine Art Appraisals كومپانياسىنىڭ تاڭباسى ساقتالعان — ءدال ۇرلىققا دەيىنگىدەي.
بۇل وقيعاداعى ەڭ ەرەكشەسى — پيكاسسونىڭ تابىلعان جەرى. م ۇلىك يەسى تيم دەرس پاتەردى بوساتىپ، تازالاپ ءجۇرىپ وفورتتى تاۋىپ العان.
«ول قابىرعادا ءبىرتۇرلى جەردە ءىلۋلى تۇردى. ول جەردە وتە ۇزاق ۋاقىت تۇرعانداي اسەر قالدىردى، سەبەبى ۇستىندە قالىڭ شاڭ بار ەدى»، — دەدى دەرس.
ەر ادام تابىلعان زاتتى انتيكۆار دوسىنا كورسەتتى. ول ودان پيكاسسونىڭ تۋىندىسىن تانىپ، بۇل 2018 جىلى ۇرلانعان وفورت بولۋى مۇمكىن دەپ بولجادى. سودان كەيىن دەرس كارتينانى پوليسياعا تاپسىردى.
ەندى قۇقىق قورعاۋ ورگاندارى ۇرلانعان جۇمىستىڭ پاتەرگە قالاي تۇسكەنىن جانە وسى ۋاقىت بويى كىم ساقتاعانىن انىقتاۋى كەرەك.
بۇعان دەيىن Kursiv LifeStyle ناسيستەر ۇرلاعان كارتينا امستەردامدا قوقىس اراسىنان تابىلعانىن جازعان ەدى.