قازاقستاندىق وقۋشىلار سيفرلىق تەحنولوگيالاردى جوعارى دەڭگەيدە مەڭگەرگەنىن جانە وقۋ ورىندارىندا وزدەرىن ءقاۋىپسىز سەزىنەتىنىن كورسەتتى. ەكونوميكالىق ىنتىماقتاستىق جانە دامۋ ۇيىمى (ەىدۇ) جاريالاعان PISA-2025 حالىقارالىق زەرتتەۋىنىڭ ناتيجەلەرى وسىنداي، دەپ حابارلايدى infohub.kz سايتى.
وقۋ-اعارتۋ مينيسترلىگىنىڭ مالىمەتىنشە، تەستىلەۋگە قازاقستاننىڭ 643 مەكتەبىنەن 22 مىڭنان استام ون بەس جاسار وقۋشى قاتىستى. PISA-نىڭ جاڭا بولىمدەرىنىڭ ءبىرى سيفرلىق قۇزىرەتتىلىكتى باعالاۋعا ارنالدى. انىقتالعانداي، قازاقستاندىق وقۋشىلاردىڭ 80%-ى جاساندى ينتەللەكت جاساعان اقپاراتتى تەكسەرۋ جانە باعالاۋ داعدىلارىن ۇيرەنەدى. سالىستىرۋ ءۇشىن، ەىدۇ ەلدەرى بويىنشا بۇل كورسەتكىش ورتاشا ەسەپپەن 63%-دى قۇرايدى. سونىمەن قاتار، وقۋشىلاردىڭ 85%-ى سيفرلىق قۇرىلعىلاردى پايدالانۋ ەرەجەلەرى مەن ۇسىنىستارى بەلگىلەنگەن مەكتەپتەردە وقيدى.
بۋللينگ ماسەلەسىنە كەلەر بولساق، قازاقستاندىق وقۋشىلاردىڭ 77%-ى قورلاۋعا تاپ بولمايتىنىن ايتتى. ەىدۇ بويىنشا مۇنداي وقۋشىلار ورتاشا ەسەپپەن 53%-دى قۇرايدى. رەسپوندەنتتەردىڭ كوپشىلىگى (71%) مەكتەپ ولاردىڭ ەرەسەك ومىرگە دايىندالۋىنا كومەكتەسەدى دەپ سانايدى، ال ەىدۇ بويىنشا بۇل كورسەتكىش 51%-عا تەڭ. وقۋشىلار مۇعالىمدەر تاراپىنان قولداۋدى دا جوعارى باعالادى.
PISA-نىڭ ءۇش نەگىزگى باعىتى بويىنشا قازاقستاندىق وقۋشىلار جاراتىلىستانۋ عىلىمدارىنان ورتاشا 420 بالل، ماتەماتيكادان 414 بالل جانە وقۋ ساۋاتتىلىعىنان 385 بالل جينادى. جاراتىلىستانۋ جانە وقۋ ساۋاتتىلىعى بويىنشا ناتيجەلەر الدىڭعى PISA-2022 زەرتتەۋىنىڭ دەڭگەيىندە قالدى، ال جاراتىلىستانۋ عىلىمدارى بويىنشا كورسەتكىش 2018 جىلمەن سالىستىرعاندا جوعارى.
زەرتتەۋ پروبلەمالىق ايماقتاردى دا انىقتادى. اتاپ ايتقاندا، وڭىرلەر مەن مەكتەپتەر اراسىنداعى ۇلگەرىم الشاقتىعىن قىسقارتۋ، وقۋشىلاردىڭ بازالىق ءبىلىمىن نىعايتۋ جانە وقىتۋ ساپاسىن ارتتىرۋ قاجەت. PISA-2025 ناتيجەلەرىن تالداۋ قورىتىندىسى بويىنشا ماماندار ءبىلىم بەرۋ جۇيەسىن ودان ءارى جەتىلدىرۋگە ارنالعان ۇسىنىستار دايىندايدى، دەپ اتاپ ءوتتى وقۋ-اعارتۋ مينيسترلىگىندە.
بۇعان دەيىن ۆەدومستۆو باسشىسى جۇلدىز سۇلەيمەنوۆا اتا-انالاردىڭ مەكتەپتەردە شاش بوياۋعا، ماكياج جاساۋعا جانە مانيكيۋرگە تىيىم سالۋ تۋرالى شاعىمدارىنا تۇسىنىكتەمە بەرگەن ەدى.