شىعىس قازاقستان وبلىسىندا پولياك ينۆەستورى پەتر باسەۆيچتىڭ قارجىلاندىرۋىمەن قۇندى بالىق تۇرلەرىن وڭدەيتىن جاڭا وندىرىستىك كلاستەر پايدا بولادى. تارباعاتاي اۋدانىنىڭ تۇعىل اۋىلىندا جۇزەگە اسىرىلاتىن جوبا تولىق سيكلدى — وسىرۋدەن باستاپ دايىن ءونىمدى ەكسپورتتاۋعا دەيىنگى پروسەستى، سونداي-اق كادرلار دايارلايتىن بەيىندىك كوللەدج اشۋدى قامتيدى... دەپ حابارلايدى infohub.kz سايتى.
ينۆەستيسيالىق جوبانى «ZAISAN SEE» ج ش س جۇزەگە اسىرادى. كاسىپورىن بازاسىندا تولىق وندىرىستىك سيكل ۇيىمداستىرىلماق: بالىقتى جاساندى كوبەيتۋ مەن وسىرۋدەن باستاپ، ونى تەرەڭ وڭدەۋگە جانە ەكسپورتقا جونەلتۋگە دەيىن. كەشەننىڭ جوبالىق قۋاتى جىلىنا ءتورت مىڭ توننا بالىق ءونىمىن قۇرايدى. تابيعيعا جاقىن جاعدايدا بالىق ءوسىرۋدى، ياعني ەكستەنسيۆتى اكۆاكۋلتۋرانى ەرەكشە نازارعا الادى. كاسىپورىن سىرتقى نارىقتا سۇرانىسقا يە قۇندى تۇرلەرگە باسىمدىق بەرەدى. اتاپ ايتقاندا، كوكسەركە شاباعىنىڭ وندىرىستىك قۋاتى جىلىنا 30 تونناعا جەتەدى، بۇل ءوڭىردىڭ بالىق قورىن تولىقتىرۋعا مۇمكىندىك بەرەدى.
زاۋىت ىسكە قوسىلعاندا كەمىندە 150 جاڭا جۇمىس ورنى اشىلادى. كادر ماسەلەسىن شەشۋ ءۇشىن تۇعىل اۋىلىندا بالىق شارۋاشىلىعى، اكۆاكۋلتۋرا جانە وڭدەۋ سالاسىنىڭ ماماندارىن دايارلايتىن كوللەدج اشۋ جوسپارلانۋدا. بۇل كاسىپورىندى جەرگىلىكتى كادرلارمەن قامتاماسىز ەتىپ، اۋىل جاستارى اراسىنداعى جۇمىسسىزدىقتى ازايتۋعا مۇمكىندىك بەرەدى.
Adata دەرەكتەرىنە سايكەس، «ZAISAN SEE» ج ش س قۇرىلتايشىلارى — پولياك بيزنەسمەنى پەتر باسەۆيچ (Piotr Basiewicz)، ۆلاديمير ياكوۆليەۆ جانە قانات رىمتايەۆ باسقاراتىن ARVO GROUP LTD جەكە كومپانياسى. باس شەتەلدىك ينۆەستور پەتر باسەۆيچ — پولشانىڭ ۆارميا-مازۋريا ۆوەۆودستۆوسىنىڭ كاسىپكەرى. باستاپقى كاپيتالىن تاماق ونەركاسىبىندە تاپقان. وعان 1999 جىلى قۇرىلعان، بالىقتى وڭدەۋ جانە مۇزداتۋمەن اينالىساتىن (مازۋريا شوقىسى، رياپۋشكا جانە شورتاندى قوسا العاندا) «Doryb» فيرماسى تيەسىلى. كەيىن باسەۆيچ اكتيۆتەرىن ءارتاراپتاندىرىپ، Developer Piotr Basiewicz برەندىمەن قۇرىلىس باعىتىن اشتى.