پولشانىڭ كونوتوپە اۋىلىندا ەۋروپاداعى ەڭ بيىك ءماريام انا ءمۇسىنىنىڭ سالتاناتتى اشىلۋى ءوتتى. مونۋمەنتتىڭ بيىكتىگى 55،6 مەتردى قۇرايدى، بۇل ونى ريو-دە-جانەيروداعى ايگىلى حريستوس-قۇتقارۋشى مۇسىنىنەن جانە پولشانىڭ سۆەبودزين قالاسىنداعى حريستوس پاتشا ەسكەرتكىشىنەن دە بيىك ەتەدى. جاڭا ءمۇسىن تەك فيليپپيندەگى 98 مەترلىك ءماريام انا مۇسىنىنەن عانا كەم تۇسەدى، دەپ حابارلايدى infohub.kz سايتى.
سالتاناتتى اشىلۋ ءراسىمى اسەرلى كورىنىسپەن ءوتتى: ەكى تىكۇشاق ءمۇسىننىڭ ۇستىنەن اينالىپ، قوناقتارعا راۋشان گ ۇلىنىڭ جاپىراقتارىن شاشتى، ال جينالعاندارعا فولكلورلىق انسامبل ءان مەن بي كورسەتتى. ەسكەرتكىش جاقىن ماڭدا تۇراتىن جەرگىلىكتى ميلليونەر كاسىپكەر رومان كاركوسيك پەن ونىڭ جۇبايى گراجينانىڭ قاراجاتىنا تۇرعىزىلدى.
مونۋمەنت تۇرعىندارى 150 ادامنان از اۋىلدا، تىكەلەي دالاعا ورناتىلعان. سالتاناتقا پولشانىڭ بۇرىنعى پرەزيدەنتى، بەيبىتشىلىك سىيلىعىنىڭ لاۋرەاتى، 82 جاستاعى لەح ۆالەنسا كەلدى. ءمۇسىندى جەرگىلىكتى ەپيسكوپ كشيشتوف ۆەتكوۆسكي باتاسىن بەردى. ونىڭ ايتۋىنشا، قولدارىن جايعان الىپ بەينە ادامدارعا قۇدايدى ەسكە سالىپ، بوس اۋرەشىلىكتەن الىستاتۋى ءتيىس. اشىلۋى قاسيەتتى ءماريامنىڭ كوككە كوتەرىلۋ مەرەكەسىنە ورايلاستىرىلدى.
بۇعان دەيىن ۆولفگانگ امادەي موسارتتىڭ تۋعان قالاسى زالسبۋرگتە ونىڭ 270 جىلدىعىنا ارنالعان كوركەم ينستاللياسيا اياسىندا ورناتىلعان 320 كومپوزيتوردىڭ التىن ءمۇسىنىنىڭ 210-ى ءبىر اي ىشىندە جوعالعانى حابارلانعان بولاتىن. ينستاللياسيا 15 شىلدەدە اشىلعان ەدى.