قازاقستاندا جولدى بەلگىلەنبەگەن جەردەن كەسىپ وتەتىن جاياۋ جۇرگىنشىلەرگە جاۋاپكەرشىلىك قاتاڭداتىلۋى مۇمكىن. وسىنداي باستامانى ۇكىمەت وتىرىسىندا پرەمەر-مينيستر ولجاس بەكتەنوۆ كوتەردى، دەپ حابارلايدى infohub.kz سايتى.
ۇكىمەت باسشىسىنىڭ ايتۋىنشا، جاياۋ جۇرگىنشىلەر قاتىسقان وقيعالاردىڭ باسىم كوپشىلىگىندە كىنا جاياۋ جۇرگىنشىلەردىڭ وزىندە. «كوشەلەردى بەلگىلەنبەگەن جەردەن كەسىپ وتەتىن ادامدارعا قاتىستى جازانى قاتاڭداتۋ كەرەك»، — دەدى ول.
سونىمەن قاتار پرەمەر-مينيستر رەتتەلمەيتىن جاياۋ جۇرگىنشىلەر وتكەلدەرىندە دە كوپتەگەن فاكتى تىركەلەتىنىن، وندا كىنا جۇرگىزۋشىلەردە ەكەنىن اتاپ ءوتتى. وسىعان بايلانىستى ول ءبىرقاتار تاپسىرما بەردى.
اكىمدىكتەرگە جاياۋ جۇرگىنشىلەر وتكەلدەرىندە بەينەباقىلاۋ جۇيەلەرىن ورناتۋدى كەڭەيتۋ، سونداي-اق اسىرەسە وقۋ ورىندارىنىڭ ماڭىندا كەرى ساناق تابلوسى بار زاماناۋي باعدارشامداردى ورناتۋدى قامتاماسىز ەتۋ تاپسىرىلدى. ىشكى ىستەر مينيسترلىگى شەتەلدىك ەلدەردىڭ كوشەلەردى اپاتقا قارسى ديزاين ەلەمەنتتەرىمەن جابدىقتاۋ تاجىريبەسىن زەردەلەۋى كەرەك.
ولجاس بەكتەنوۆ جۇرگىزۋشىلەردىڭ ۇيالى تەلەفون قولدانۋىنان بولاتىن اپاتتارعا جەكە توقتالدى. «جولدارداعى بارلىق اۆتوماتتاندىرىلعان جۇيەلەر رۋلدە تەلەفون قولدانۋ فاكتىلەرىن بارىنشا انىقتاۋعا باپتالۋى ءتيىس. جالپى ءىىم اكىمدىكتەرمەن بىرلەسىپ، ورناتىلعان بارلىق كامەرالاردىڭ جۇمىس قابىلەتىن تەكسەرۋدەن وتكىزۋى كەرەك»، — دەپ قوستى پرەمەر.
بۇعان دەيىن ىشكى ىستەر مينيسترلىگى بيىلعى جىلدىڭ باسىنان بەرى قازاقستان پوليسەيلەرى جول قوزعالىسى ەرەجەلەرىنىڭ 226 مىڭنان استام بۇزۋشىلىعىن انىقتاعانىن، ال مامانداندىرىلعان تۇراقتارعا 46 مىڭنان استام كولىك قۇرالى قويىلعانىن حابارلاعان. سونىمەن قاتار ءىىم جولدارداعى قانداي بۇزۋشىلىقتاردىڭ دروندار ارقىلى انىقتالاتىنىن ايتقان.