ەلباسى جولداۋى - حالىقتىڭ قولداۋى

ەلباسىمىز نۇرسۇلتان ءابىش ۇلى نازاربايەۆ قازاقستان حالقىنا ارنالعان ءداستۇرلى جولداۋىن جاريالادى. جالپى تاۋەلسىزدىگىنە جيىرما جىلدان استام ۋاقىت بولعان ەل ەگەمەندىگىنىڭ تاريحىنا ۇڭىلسەك، مەملەكەتىمىزدىڭ الۋان باعىتتاعى تىنىس - تىرشىلىگىنىڭ دامۋىنا بىردەن - ءبىر ىقپال ەتكەن فاكتور - بۇل ەلباسىمىزدىڭ حالىققا ارناعان جولداۋى ەكەندىگىنە كوز جەتكىزەر ەدىك.
ەلباسىنىڭ «قازاقستان جولى - 2050: ءبىر ماقسات، ءبىر مۇددە، ءبىر بولاشاق» اتتى جولداۋى بويىنشا پرەزيدەنتتىڭ جالپىۇلتتىق يدەياسى - بولاشاق تابىستاردىڭ نەگىزى ەكەنى باسا ايتىلدى. ال ەڭ باستىسى - ەلىمىزدىڭ رۋحىن كوتەرەتىن، ۇلى ماقساتتارعا جەتكىزەتىن «ماڭگىلىك ەل» ۇلتتىق يدەياسى جاريالاندى. «ماڭگىلىك ەل» يدەياسى - ەلىمىزدى ءوز ماقساتىنا تالاي ءداۋىر سىنىنان سۇرىندىرمەي جەتكىزەتىن تۇعىرلى يدەيا. وسىنىڭ بارلىعى دامىعان 30 ەلدىڭ قاتارىنا كىرۋىمىزگە جاڭا سەرپىن بەرەتىنى ءسوزسىز.

ەلباسى جولداۋىندا ءبىلىم سالاسى قىزمەتكەرلەرىنىڭ الدىنا ۇلكەن مىندەتتەر قويدى. «ۇلتتىق ءبىلىم بەرۋدىڭ بارلىق بۋىنىنىڭ ساپاسىن جاقسارتۋدا ءبىزدى اۋقىمدى جۇمىس كۇتىپ تۇر. 2020 جىلعا قاراي قازاقستانداعى 3 - 6 جاس ارالىعىنداعى بالالاردى مەكتەپكە دەيىنگى بىلىممەن 100 پايىز قامتۋ جوسپارلانۋدا. سوندىقتان ولارعا زاماناۋي باعدارلامالار مەن وقىتۋ ادىستەمەلەرىن، بىلىكتى ماماندار ۇسىنۋ ماڭىزدى. ورتا ءبىلىم جۇيەسىندە جالپى ءبىلىم بەرەتىن مەكتەپتەردى نازاربايەۆ زياتكەرلىك مەكتەپتەرىندەگى وقىتۋ دەڭگەيىنە جەتكىزۋ كەرەك. مەكتەپ تۇلەكتەرى قازاق، ورىس جانە اعىلشىن تىلدەرىن بىلۋگە ءتيىس»، دەپ اتاپ كورسەتتى.

وسىعان وراي، ۇلكەن جاۋاپكەرشىلىك جۇكتەلىپ وتىرعان مۇعالىمدەرگە جاڭاشىلدىقپەن جۇمىس جاساۋعا تۋرا كەلەدى. ەڭ الدىمەن بارلىق ءپان بويىنشا ءبىلىم ساپاسىن ارتتىرۋ كەرەك. سول ماقساتتا اقتوبە قالاسىنداعى №32 ورتا مەكتەپ - گيمنازيا مۇعالىمدەرى دە تىنباي ەڭبەكتەنىپ، ءوز ۇلەستەرىن قوسۋدا. 2013 - 2014 وقۋ جىلىنان باستاپ، مازمۇندى جانە وقىتۋ تەحنولوگياسىن جاڭارتۋ نەگىزىندە ورتا ءبىلىم بەرۋدىڭ ساپاسىن ەلەۋلى ارتتىرۋ ماقساتىندا ەكسپەريمەنتتى «e - Learning» ەلەكتروندى وقىتۋ جۇيەسى ەنگىزىلدى.
e - Learning ەلەكتروندىق وقىتۋ جۇيەسى - قازاقستان رەسپۋبليكاسىندا ءبىلىم بەرۋدى دامىتۋدىڭ 2011 - 2020 جىلدارعا ارنالعان مەملەكەتتىك باعدارلاماسىنا قوسىلعان اۋقىمدى مەملەكەتتىك جوبا.
تاعى ءبىر جايت - ءتىل ماسەلەسى. سوندىقتان ەلباسىمىز دا ءتىلدى داۋ-دامايدىڭ توركىنىنە ەمەس، دامۋ مەن وركەندەۋدىڭ نەگىزىنە، ۇلتتىڭ ۇيىتقىسىنا اينالدىرۋ - بارشامىزدىڭ پارىزىمىز ەكەندىگىن بارىمىزگە دە تاعى ءبىر مارتە تياناقتى ۇعىندىردى دەپ ويلايمىن.

اقتوبە قالاسىنداعى تۇڭعىش قازاق گيمنازياسى قازاق ءتىلىن دامىتۋدا اۋقىمدى شارالار وتكىزە وتىرىپ، ءتىل مارتەبەسىن ودان ءارى وركەندەتۋگە زور مىندەتتەر قويىپ وتىر. ماڭگىلىك ەلدىڭ ماڭگىلىك تىلىنە اينالعان ءتىلىمىزدىڭ مارتەبەسى ارتا بەرەرى انىق.
ەلباسىنىڭ ءار جولداۋى - تولعاۋى تەرەڭ قايتالانباس دۇنيە. بيىلعى جولداۋ دا پرەزيدەنتىمىزدىڭ وزىندىك ستيلىنە سايكەس كوپتەگەن ەرەكشەلىكتەرىمەن ەل ەسىندە قالادى دەگەن سەنىمدەمىن.