تارازدا جەكە سوت ورىنداۋشىسى بورىشكەرلەردەن تۇسكەن اقشانىڭ ءبىر بولىگىن يەمدەنىپ، جەكە ماقساتىنا جۇمساعان. ءۇش جابىرلەنۋشىگە كەلتىرىلگەن جالپى زالال 1 ميلليون تەڭگەدەن استى، دەپ حابارلايدى infohub.kz.
تاراز قالاسىنىڭ №2 سوتىنىڭ انىقتاۋىنشا، جەكە سوت ورىنداۋشىسى بىرنەشە ەپيزود بويىنشا ءوندىرىپ الۋشىلارعا تيەسىلى اقشانى ۇستاپ قالعان. ونىڭ كىناسى جابىرلەنۋشىلەر مەن كۋاگەرلەردىڭ ايعاقتارى، زاتتاي دالەلدەمەلەر جانە قىلمىستىق ءىستىڭ باسقا ماتەريالدارىمەن دالەلدەنگەن. سوت وتىرىسىندا ەر ادام كىناسىن تولىق مويىنداپ، كەلتىرىلگەن زالالدى وتەگەنىن ايتىپ، جەڭىلىرەك جازا تاعايىنداۋدى سۇراعان. جابىرلەنۋشىلەر وتەماقى العان سوڭ قاتاڭ جازا تالاپ ەتپەگەن.
مەملەكەتتىك ايىپتاۋشى سوتتالۋشىعا امنيستيا زاڭىن قولدانا وتىرىپ، ەكى جىل باس بوستاندىعىن شەكتەۋ جازاسىن تاعايىنداۋدى سۇراعان. سوت ۇكىمىمەن س. قىلمىستىق كودەكستىڭ 251-بابى 2-بولىگى بويىنشا كىنالى دەپ تانىلىپ، 2 جىلعا باس بوستاندىعىن شەكتەۋ جازاسى كەسىلدى. امنيستيا زاڭى قولدانىلىپ، سوتتالۋشى نەگىزگى جازانى وتەۋدەن بوساتىلدى، — دەپ مالىمدەدى سوت. سوت كىنانى مويىنداۋ، زالالدى تولىق وتەۋ جانە سوتتالۋشىنىڭ كامەلەتكە تولماعان بالالارىنىڭ بولۋىن ەسكەرگەن. اۋىرلاتاتىن ءمان-جايلار انىقتالماعان. ۇكىم زاڭدى كۇشىنە ەنگەن.
بۇعان دەيىن قازاقستاندا جەكە سوت ورىنداۋشىلارىنىڭ قىزمەتىن باقىلاۋ كۇشەيتىلگەنى حابارلانعان بولاتىن. ولار ءۇشىن مىندەتتى اتتەستاتتاۋ ەنگىزىلىپ، ادىلەت ورگاندارى مەن جەكە سوت ورىنداۋشىلارى پالاتاسى تەكسەرۋ كەزىندە بانك ۇزىندىلەرىن سۇراتۋ قۇقىعىنا يە بولدى. اتتەستاتتاۋدان وتپەگەن جاعدايدا ليسەنزيادان ايىرىلۋى مۇمكىن.