پروبلەمالىق نەسيەلەر قورى سوتقا جەكە ءوتىنىش بەرمەي-اق، قارىزدارى وزىنە اۋىسقان بورىشكەرلەردىڭ شوتتارىنان اقشا ءوندىرىپ الۋ قۇقىعىن الدى. ءۇمىتسىز قارىزداردى قايتا قۇرىلىمداۋعا نەمەسە تولىق ەسەپتەن شىعارۋعا بولادى، دەپ حابارلايدى infohub.kz سايتى.
قور پروبلەمالىق نەسيەلەردى ۇلتتىق بانكتەن، بانكتەردەن جانە بۇرىن بانك رەتىندە جۇمىس ىستەگەن ۇيىمداردان ساتىپ الاتىن بولادى. قارىز الۋشىنىڭ، كەپىل بەرۋشىنىڭ نەمەسە كەپىلگەردىڭ نەسيە بەرۋشىنى اۋىستىرۋعا كەلىسىمى تالاپ ەتىلمەيدى.
جاڭا وكىلەتتىكتەر مەرزىمى 90 كۇننەن اساتىن، قارىزى كەمىندە ءۇش رەت قايتا قۇرىلىمدالعان نەمەسە كەيىنگە قالدىرۋ مەرزىمى ءبىر جىلدان اساتىن نەسيەلەرگە قاتىستى.
90 كۇندىك مەرزىم وتكەننەن كەيىن قور كوللەكتورلاردى تارتا الادى جانە بانككە تولەم تالابىن جىبەرە الادى. شوتتان نەگىزگى بورىشتى، سىياقىلاردى، كوميسسيالاردى، ايىپپۇلداردى جانە ءوسىمپۇلداردى ءوندىرىپ الۋعا رۇقسات ەتىلەدى.
ءبىر مەزگىلدە بورىشكەرگە كەيىنگە قالدىرۋ نەمەسە ءبولىپ تولەۋ، جەڭىلدىكتى كەزەڭ، يكەمدى تولەم كەستەسى، سونداي-اق قارىزدىڭ، سىياقىلاردىڭ نەمەسە ايىپپۇلداردىڭ ءبىر بولىگىن جويۋ ۇسىنىلۋى مۇمكىن.
قارىزدى تولىق ەسەپتەن شىعارۋ بارلىق ءوندىرىپ الۋ تاسىلدەرى تاۋسىلعاننان كەيىن عانا رۇقسات ەتىلەدى. نەگىزگە بورىشكەردىڭ بانكروتتىعى، اتقارۋشىلىق ءىس جۇرگىزۋدى توقتاتۋ، مۇراگەرسىز قايتىس بولۋى نەمەسە سوت شەشىمى الىنۋى مۇمكىن.
قاۋلىنىڭ ماتىنىمەن نورماتيۆتىك قۇقىقتىق اكتىلەر پورتالىندا تانىسۋعا بولادى. جاڭا ەرەجەلەر 2026 جىلعى 20 شىلدەدەن باستاپ كۇشىنە ەنەدى.
بۇعان دەيىن قوردىڭ بۇرىنعى باسشىسى وكىلەتتىكتەرىن اسىرا پايدالاندى دەگەن ءىس بويىنشا ۇستالعان بولاتىن؛ مەملەكەتكە كەلتىرىلگەن زالال 11،4 ملرد تەڭگەگە باعالاندى.