اباي وبلىسىنىڭ پروكۋراتۋراسى ءىرى مىس ءوندىرۋشى KAZ Minerals Aktogay كومپانياسىن اكىمشىلىك جاۋاپكەرشىلىككە تارتۋدى زاڭسىز دەپ تانىپ، ونى جويدى. ونىڭ ورنىنا ەكولوگيا دەپارتامەنتىنىڭ لاۋازىمدى تۇلعاسى جازالاندى، دەپ حابارلايدى infohub.kz سايتى.
«اباي وبلىسىندا پروكۋراتۋرا ينۆەستوردىڭ قۇقىعىن قورعاپ، KAZ Minerals Aktogay كومپانياسىن اكىمشىلىك جاۋاپكەرشىلىككە زاڭسىز تارتۋدى جويدى. وبلىستىق تابيعاتتى قورعاۋ پروكۋراتۋراسى ەكولوگيا دەپارتامەنتى كومپانياعا قاتىستى اكىمشىلىك ءىستى زاڭدا كوزدەلگەن تەكسەرۋ جۇرگىزبەي جانە مەملەكەتتىك باقىلاۋدىڭ بەلگىلەنگەن ءتارتىبىن بۇزىپ قوزعاعانىن انىقتادى»، – دەلىنگەن قاداعالاۋ ورگانىنىڭ جاريالاعان حابارلاماسىندا.
كومپانيا تولەۋگە ءتيىس ايىپپۇل مولشەرى ناقتىلانباعان. سونىمەن قاتار سوت ەكولوگيا دەپارتامەنتى باسشىسىنىڭ ورىنباسارىن جاۋاپكەرشىلىككە تارتتى.
«بۇدان بولەك، سوت ەكولوگيالىق رەتتەۋ جانە باقىلاۋ كوميتەتىنە انىقتالعان بۇزۋشىلىقتاردى جويۋ تۋرالى جەكە قاۋلى شىعاردى. ەكولوگيا دەپارتامەنتى باسشىسىنىڭ ورىنباسارى دا جاۋاپكەرشىلىككە تارتىلدى – سوت ونى 20 اەك (2026 جىلى 86،5 مىڭ تەڭگە) مولشەرىندە ايىپپۇل تۇرىندەگى اكىمشىلىك جاۋاپكەرشىلىككە تارتتى»، – دەپ اتاپ ءوتتى پروكۋراتۋرادا. جازالانعان لاۋازىمدى تۇلعانىڭ ءاتى-جونىن پروكۋراتۋرا ناقتىلامادى.
جاريالاۋ ساتىندە وبلىستىق ەكولوگيا دەپارتامەنتىنىڭ سايتىندا دەپارتامەنت باسشىسى – سەرىك سارباسوۆ، ال ونىڭ جالعىز ورىنباسارى – ورالحان اۋەزبەكوۆ دەپ كورسەتىلگەن.
KAZ Minerals Aktogay قازاقستاننىڭ ەڭ ءىرى مىس ءوندىرۋشى كومپانياسى KAZ Minerals قۇرامىنا كىرەدى. سوڭعىسىنىڭ 63،5% اكسياسىن Forbes نۇسقاسى بويىنشا $5،9 ملرد كاپيتالىمەن ەڭ باي قازاقستاندىقتار تىزىمىندە ەكىنشى ورىندا تۇرعان كاسىپكەر ۆلاديمير كيم يەلەنسە، 36،5% ۇلەسى ونىڭ مىس بيزنەسىندەگى كوپجىلدىق سەرىكتەسى ولەگ نوۆاچۋككە ($388 ملن، 30-ورىن) تيەسىلى.
KAZ Minerals اباي وبلىسىندا جىلىنا 300 مىڭ توننا كاتودتى مىس وندىرەتىن مىس قورىتۋ زاۋىتىن 2030-2031 جىلدارى ىسكە قوسادى، دەپ مالىمدەدى «كۋرسيۆكە» ماۋسىمدا KAZ Minerals Management باس ديرەكتورى ايجان بالاباتىروۆا. مىس قورىتۋ زاۋىتى اباي وبلىسىنىڭ اياگوز اۋدانىنداعى اقتوعاي كەنتىنىڭ ماڭىندا ورنالاسادى. ول كەزدە جوبا بويىنشا الدىن الا تەحنيكالىق-ەكونوميكالىق نەگىزدەمە دايىندالعان. زاۋىت كاتودتى مىستان بولەك التىن جانە كۇمىس قۇيمالارىن دا شىعارادى.