نۋراي سەرىكبايدى ءولتىرۋ ءىسى بويىنشا سوت پروسەسىنىڭ نەگىزگى بولىگى اياقتالىپ، تاراپتار پىكىرتالاسقا كوشتى. مەملەكەتتىك ايىپتاۋشى ماديار ءابىلقاسىموۆ 28 جاستاعى شەرحان ايماحانوۆتى ءومىر بويى باس بوستاندىعىنان ايىرۋدى سۇرادى، دەپ حابارلايدى infohub.kz سايتى.
پروكۋروردىڭ ايتۋىنشا، ايىپتالۋشىنىڭ كىناسى قىلمىستىق كودەكستىڭ ءۇش بابى بويىنشا تولىق دالەلدەنگەن: 99-باپتىڭ 2-بولىگىنىڭ 5-تارماعى (اسا قاتىگەزدىكپەن ءولتىرۋ)، 125-باپتىڭ 1-بولىگى (نەكەگە تۇرۋعا ماجبۇرلەۋ) جانە 115-باپتىڭ 2-بولىگى (ستالكينگ).
«ءومىر بويى باس بوستاندىعىنان ايىرۋ جازاسىن تاعايىنداۋدى سۇرايمىن. جازانى قىلمىستىق-اتقارۋ جۇيەسىنىڭ ەرەكشە قاۋىپسىزدىك مەكەمەسىندە وتەۋدى سۇرايمىن. جازانى وتەۋ مەرزىمىن ۇكىم جاريالانعان كۇننەن باستاپ ەسەپتەۋدى سۇرايمىن. ايماحانوۆقا قاتىستى بۇلتارتپاۋ شاراسىن – كۇزەتپەن ۇستاۋدى وزگەرىسسىز قالدىرۋدى سۇرايمىن»، – دەپ پروكۋروردىڭ ءسوزىن كەلتىرەدى باسىلىم.
ەسكە سالايىق، نۋراي سەرىكباي 11 قاڭتاردا قايتىس بولعان. تەرگەۋ جەتى ايعا سوزىلىپ، شىلدەدە اياقتالدى، ال سوت پروسەسى 21 شىلدەدە باستالدى. بۇعان دەيىن ايماحانوۆ پىشاق جاراقاتىن سالعان ءساتتى ەسىنە المايتىنىن ايتىپ، ءتىپتى قىز وعان ءبىرىنشى بولىپ سوققى جاساعانىن مالىمدەگەن. الايدا سوت-مەديسينالىق ساراپشى قۇربانعا 35 پىشاق جاراقاتى سالىنعانىن جانە ول كەزدە ول ءالى ءتىرى بولعانىن ايتتى. پسيحولوگيالىق ساراپتاما ايماحانوۆتىڭ قىلمىس كەزىندە ءوز ارەكەتتەرىن تولىق باقىلاعانىن كورسەتتى.
21 جاستاعى قىزدىڭ قايتىس بولۋى قوعامدا كەڭ رەزونانس تۋدىرىپ، ستالكينگ پەن قىز الىپ قاشۋ ماسەلەلەرىنە تاعى دا نازار اۋدارتتى.