قازاقستاننىڭ ەكىنشى راكەتكاسى يۋليا پۋتينسەۆا جاپونيادا ءوتىپ جاتقان ازيا ويىندارىنىڭ تەننيس تۋرنيرىندە جارتىلاي فينالعا شىققان العاشقى قازاقستاندىق تەننيسشى اتاندى: شيرەك فينالدا ول تايلاند وكىلى مانانچايا ساۆانگكاەۆتى 6:3، 6:0 ەسەبىمەن جەڭدى، دەپ حابارلايدى infohub.kz سايتى.
پۋتينسەۆا قارسىلاسىنا ەسىن جيناۋعا مۇمكىندىك بەرمەدى: ارتقى سىزىقتان جاساعان قۋاتتى ءارى ءدال سوققىلارىن ايلالى قىسقا دوپتارمەن ۇشتاستىرىپ وتىردى. 1 ساعات 14 مينۋتتان كەيىن تايلاندتىق تەننيسشى جەڭىلىسىن مويىندادى.
قازاقستان – تايلاند اراسىنداعى وزىندىك ماچتى ەرلەر جالعاستىردى. الەكساندر شەۆچەنكو ماكسيمۋس دجونستى 6:1، 6:4 ەسەبىمەن جەڭىپ، شيرەك فينالعا شىقتى. تيموفەي سكاتوۆ كاسيديت سامرەيگە 2:6، 6:7 (6:8) ەسەبىمەن جول بەردى.
جىبەك قۇلامباەۆا سونيا جيەنباەۆامەن بىرگە مىقتى جاپوندىق شۋكو اوياما/ەنا سيباحارا جۇبىن 6:4، 6:4 ەسەبىمەن تىزە بۇكتىردى. ءبىزدىڭ قىزدار دا شيرەك فينالعا ءوتتى.
ازيا ويىندارى-2026
تەننيس. 30 قىركۇيەك
ايەلدەر. 1/4 فينال
🎾 يۋليا پۋتينسەۆا (قازاقستان، 82) – مانانچايا ساۆانگكايەۆ (تايلاند، 90) 6:3، 6:0
ەرلەر. 1/8 فينال
🎾 تيموفەي سكاتوۆ (قازاقستان، 204) – كاسيديت سامرەي (تايلاند، 389) 2:6، 6:7 (6:8)
🎾 الەكساندر شەۆچەنكو (قازاقستان، 109) – ماكسيمۋس دجونس (تايلاند، 487) 6:1، 6:4
ايەلدەر. جۇپتىق. 1/8 فينال
🎾 جىبەك قۇلامباەۆا (105)/سونيا جيەنباەۆا (384) (قازاقستان) – شۋكو اوياما (23)/ەنا سيباحارا (76) (جاپونيا) 6:4، 6:4
بۇگىن تەننيس ازياداسىندا قازاقستاندىقتار قاتىساتىن تاعى ءتورت ماچ وتەدى.
XX جازعى ازيا ويىندارى 19 قىركۇيەكتە رەسمي تۇردە اشىلدى جانە 4 قازاندا اياقتالادى. 45 ەلدىڭ سپورتشىلارى قاتىساتىن جارىستا 460 كومپلەكت مەدال ساراپقا سالىنۋدا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى سىنعا تۇسۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۇلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين قوستى. التىنشىسىن – ارالاس جەكپە-جەكتەگى كوماندالاسى قادىربەك شىنبايەۆ. 23 قىركۇيەكتە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى جۇپتىق ەسۋ سايىسىندا جەڭىپ الدى. توعىزىنشى التىن مەدالدى ءبىزدىڭ شپاگا شەبەرلەرىنىڭ كومانداسى يەلەندى.
ويىنداردىڭ ون كۇنىنەن كەيىن قازاقستان بەيرەسمي مەدال ەسەبىندە سەگىزىنشى ورىندا تۇردى.