قايران دا، قايران، قايران تاۋ،
ءتيۋشى ەدى پايداڭ تاۋ.
پايداسىنىڭ بەلگىسى -
ۇيىمدە تۇرعان ۇلگىسى.
ۇلگىسىنىڭ ورنەگى:
شاڭىراعىم، ۋىعىم،
ۇيدە باقان، سىرىعىم.
ات ۇستايتىن قۇرىعىم،
قازانىما قاقپاعىم،
جەلى ءبىر قاعار توقپاعىم،
ارباما ارىس بىلىگىم،
ەل قىستاۋعا قونعاندا،
سيىر ءبىر جاتار شىلىگىم،
ات جۇرە الماس ارالدىم
ىشىڭدە بۇعى، مارالدىم!
بۇعى دا، مارال جاتقان جەر،
مەرگەندەر تاڭداپ اتقان جەر.
مەرەكەگە باتقان جەر،
ارتىعىن الىپ ساتقان جەر!
ءۇش اتامىز وتكەن تاۋ،
ءۇش مىڭ قارا بىتكەن تاۋ،
اكەم كۇيەۋ بولعان تاۋ،
شەشەم كەلىن بولعان تاۋ.
اق بۇركەنشەك سالىنىپ،
الا بەرەن كيگەن تاۋ،
يت جۇگىرتىپ، قۇس سالىپ،
وزىمە تەڭدىك تيگەن تاۋ!
مۇنارلانىپ ارتىمدا
قالا بەردىڭ كورىنىپ.
ىلگەرى قاراي اياعىم
ءبىر باسپادى-اۋ ەرىنىپ!
كوڭىل ەرىپ، جاس كەلىپ،
كەتتى-اۋ ءوڭىم وزگەرىپ!
باي توبەتىم ماڭقىلداپ،
داۋسى قۇداي ساڭقىلداپ،
بايسال تاۋىپ ۇرگەن تاۋ .
بالالى قازداي بايپاڭداپ،
بايبىشە داۋرەن سۇيگەن تاۋ.
دۋاداقتاي توڭقاڭداپ،
توقالدار داۋرەن سۇرگەن تاۋ.
كەتەيىن دەپ كەتپەدىم.
توڭىرەگىڭ تولعان جاۋ.
شابىندى، قوعا، قامىسىم،
تامام جۇرتقا تانىسىم،
مىنا دا كورگەن زورلىقتان
قالادى-اۋ ەسىل قونىسىم!
بوراندا مالىم شىقپاعان،
ءۇيىمدى داۋىل جىقپاعان.
شاعىر ءبىر جۋسان، يزەندىم،
سەنەن كەتىپ كۇيزەلدىم.
بايلاۋلى اتقا پىشەنىم،
ماتاۋلى اتقا كىسەنىم.
ات ارقاندار قازىعىم،
بالالارعا ازىعىم!
كەتەيىن دەپ، كەتپەدىم،
ويدا - ورىس، قىردا قازاقتان
تىنىشىم ءبىر كەتتى-اۋ جازىعىڭ!
قوجىر، قوجىر تاستارىم،
سەن ەسىمە تۇسكەندە،
كوزىمنەن اقتى-اۋ جاستارىم!
اششىنىڭ بويى اي تاتىر،
بالاۋسا ءشوبىڭ بال تاتىر ،
بالدىرعانىڭ ماي تاتىر.
اقتىلى قوي ايداتتىر،
الالى جىلقى جۋساتتىر!
شىبىشىم لاق سالماعان،
توقتىم ءبىر قىسىر قالماعان.
ءۇش اي توقسان سوقسا دا
مالىم جۇتاپ قالماعان،
جەلىنى سىزداپ ماڭىراعان،
ءتولى شۋلاپ جامىراعان.
ون ەكى قازىلىق، وي-تۇندىك،
ماڭىراپ جاتكان قوي - تۇندىك!
ەسىل-نۇرا- ەكى سۋ -
ەڭكەيىپ ودان بەتىڭ جۋ.
ءبىرىڭ - شەكەر، ءبىرىڭ - بال،
ءقايبىرىڭدى ايتايىن؟!
بەتەگە، كادە، جاۋىلشا-
شۋلاپ تۇرعان ءبارىڭ مال.
كەۋىر كەلدى-اۋ قيقۋلاپ،
«اش قۇلاقتان تىنىش قۇلاق!» -
كەتە بەردىم زار جىلاپ،
كوبەيگەن سوڭ كۇندە شۋ.
قارقارالى، قازىلىق،
جاتۋشى ەدىڭ جازىلىپ!
جازعىتۇرى كوشكەندە،
قالۋشى ەدىڭ، قارا جول،
قابىرعادان قازىلىپ.
كۇزگىتۇرىم قونعاندا،
ءتورت تۇلىك مال باۋرايدا،
جاتۋشى ەدى جاي تاۋىپ،
قۇلاشىن كەرىپ جازىلىپ.
ەگىزىمنىڭ سىڭارى
ءبىرىن سويسام، توي بولعان.
قالعان ءبىرى جەتىلىپ،
كەلەر جىلى وزىندەي
ىڭىرانىپ سەمىز قوي بولعان.
سويعانىمنىڭ تەرىسى
يلەي بىلگەن شەبەرگە
ءبىر ءوزى ءبىر بوي بولعان.
يلەي بىلمەس جامانعا
ەل قىدىرىپ كەتكەندە،
كەك الا شولاك يتتەرگە
كوكپارى بولىپ تارتىلىپ،
زور مەرەكە توي بولعان.
ءبىز بارارمىز، بارارمىز،
بارىپ قايدا وڭارمىز؟!
بارساق، زالال تارتارمىز!
سەندەي جەردى جالعاندا،
ىزدەپ قايدان تابارمىز؟!
ەگىن دە جايىن بىلمەسەك،
ارىپ، شارشاپ، تالارمىز!
تارىنىڭ سوگىن جالارمىز،
شوپشەك تەرىپ، ءشوپ جيىپ،
اشتان ءولىپ كالارمىز!

---