الماتى تاۋلارىندا كوتەرىلىپ كەلە جاتقان تۋريستەر سيرەك كەزدەسەتىن جىرتقىشپەن توسىننان تاپ بولدى: قار بارىسى ادامدار جۇرگەن سوقپاققا كەنەتتەن شىعا كەلدى، دەپ حابارلايدى infohub.kz سايتى.
توپتىڭ جانىندا يت بولدى، ول جانۋارعا ۇرە باستادى. كادرلاردا قار بارىسىنىڭ بەتكەيدە تىنىش تۇرىپ، بولىپ جاتقان جاعدايدى باقىلاپ وتىرعانى كورىنەدى. تۋريستەر وعان جاقىنداماۋعا تىرىسىپ، ءيتتى الىستاۋعا الىپ كەتۋگە ارەكەتتەنەدى.
«مۇندا كەلمەڭدەر! يتكە تيىسپەڭدەر!» — دەپ ەستىلەدى كادر سىرتىندا.
جىرتقىشتى كورگەندە ۆيدەو اۆتورلارى الدىمەن ابدىراپ قالعانى بايقالادى، كەيىن جانۋارعا ءتانتى بولا باستادى.
«قانداي ادەمى! سەن مەنىڭ سۇلۋىمسىڭ»، — دەيدى ايەل كادر سىرتىندا.
سونىمەن قاتار تۋريستەر بىر-بىرىنە بارىستى اشۋلاندىرۋعا بولمايتىنىن بىرنەشە رەت ەسكەرتىپ وتىردى. جاريالانىم اۆتورلارىنىڭ ايتۋىنشا، ءبىراز ۋاقىتتان كەيىن بۇل تۇسقا باسقا تۋريستەر كەلگەن. بارىس بەتكەيمەن جوعارى قاراي تىنىش كەتىپ قالعان. يت ونى قايتا كورىپ، ۇرە باستاعاندا، ادامدار ونى الىپ، تومەن ءتۇسۋدى جالعاستىردى.
تۋريستەر كەزدەسۋ ورنىن ناقتىلاماۋدى شەشتى. ولار مۇنى قار بارىسى سيرەك جانە قۇندى جانۋار ەكەندىگىمەن، ال كوورديناتتاردى جاريالاۋ ادامداردى سول جەرگە تارتىپ، جىرتقىشقا زيان كەلتىرۋى مۇمكىندىگىمەن ءتۇسىندىردى.
پىكىرلەردە قولدانۋشىلار توسىن كەزدەسۋگە جانە قار بارىسىنىڭ كەلبەتىنە ءتانتى بولدى. كوبىسى جانۋاردى ادەمى جانە ايبارلى دەپ اتادى، ال كەيبىرەۋلەرى وسىنداي ءسات ءۇشىن تاۋلاردا جىلدار بويى جۇرۋگە تۇرارلىق دەپ ازىلدەدى. ۆيدەو اۆتورى توعىز جىل ىشىندە بۇل ونىڭ ءبىرىنشى وسىنداي كەزدەسۋى بولعانىن ايتتى.
«وي، قانداي ادەمى! تاۋ پەيزاجىمەن استاسىپ كەتكەن، ءارى ايبارلى! ۆيدەو ءۇشىن راقمەت».
«ۋاۋ».
«تەك ورنىن كورسەتپەڭىزدەر، وتىنەمىن. وكىنىشكە قاراي، ءبىزدىڭ ءتۇرىمىزدىڭ اراسىندا وعان تەك زيان كەلتىرەتىندەر بار»، — دەپ جازادى قولدانۋشىلار.
بۇعان دەيىن «كۋرسيۆ» «التىن-ەمەل» ۇلتتىق پاركىندە عىلىمي-دالالىق زەرتتەۋلەر كەزىندە فوتوكاقپاندار قار بارىستارىن بىرنەشە رەت تۇسىرگەنىن جازعان. سيرەك جىرتقىشتار تابيعي ورتادا ءجۇرىپ، سۋاتقا كەلگەن.