قاراعاندى وبلىسىنىڭ رەسپۋبليكالىق جانە وبلىستىق اۆتوموبيل جولدارىندا 25 قىركۇيەكتەن باستاپ 19 ءموبيلدى بلوكبەكەت جۇمىس ىستەي باستادى. ولار قىس تۇسكەنگە دەيىن جۇمىس ىستەيدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ ۆەدومستۆولىق سايتىندا حابارلانعانداي، پوليسيا وسىلايشا مال مەن ەت ونىمدەرىن تاسىمالداۋدى باقىلاۋدى كۇشەيتتى. شارا ءداستۇرلى كۇزگى مال سويۋ قارساڭىندا قابىلدانىپ، ەڭ الدىمەن مال ۇرلىعىنىڭ الدىن الۋعا جانە ونى توقتاتۋعا باعىتتالعان.
بەكەتتەردە پوليسيا قىزمەتكەرلەرى مال مەن ەت ونىمدەرىن تاسىمالدايتىن كولىكتى، سونداي-اق ولاردىڭ شىعۋ تەگىن جانە تاسىمالداۋدىڭ زاڭدىلىعىن راستايتىن قۇجاتتاردى تەكسەرەدى. قاجەتتى قۇجاتتار بولماعان جاعدايدا كولىك تەكسەرۋ جۇرگىزۋ جانە جۇكتىڭ يەسىن انىقتاۋ ءۇشىن اۋماقتىق پوليسيا بولىمىنە جەتكىزىلەدى.
«ءموبيلدى بلوكبەكەتتەر مال مەن ەت ونىمدەرىنىڭ قوزعالىسىنىڭ نەگىزگى باعىتتارىن باقىلاۋعا مۇمكىندىك بەرەدى. ەگەر قۇجاتتار كۇمان تۋدىرسا نەمەسە مۇلدە بولماسا، جۇك ونىڭ شىعۋ تەگى مەن يەسى انىقتالعانشا تەكسەرىلەدى. وتكەن جىلى تەمىرتاۋ ماڭىنداعى بلوكبەكەتتە پوليسەيلەر اقمولا وبلىسىندا ۇرلانعان 46 جىلقىنى تاپقان بولاتىن. سوندىقتان مۇنداي بەكەتتەردىڭ مال ۇرلىعىنىڭ الدىن الۋ مەن ونى اشۋدا ماڭىزى زور»، — دەدى قاراعاندى وبلىسى پوليسيا دەپارتامەنتى كريمينالدىق پوليسيا باسقارماسى باستىعىنىڭ ورىنباسارى مەيىرجان سلامبەكوۆ.
ىشكى ىستەر مينيسترلىگىنىڭ دەرەگىنشە، ءموبيلدى بلوكبەكەتتەر قىس تۇسكەنگە دەيىن جۇمىس ىستەيدى.