قاراعاندىدا 23 جاستاعى قىزدىڭ قازاسىنا قاتىستى بۇرىنعى پوليسيا مايورىنا قارسى سوت پروسەسى باستالدى. قىزدىڭ دەنەسى ۋچاسكەلىك پوليسيا قىزمەتكەرىنىڭ كابينەتىنەن تابىلعان بولاتىن. سوت ءىستى جابىق تۇردە قاراۋعا شەشىم قابىلدادى، دەپ حابارلايدى infohub.kz سايتى.

وتىرىسقا مارقۇم قىزدىڭ اناسى مەن اپاسى كەلدى. كتك تەلەارناسىنىڭ دەرەگىنشە، ولاردىڭ مۇددەسىن وبلىستىق پروكۋراتۋرا قورعايدى.

تالقىلاۋ باستالماي تۇرىپ، سوتتالۋشىنىڭ قورعاۋشىسى اسەت تۇبەكوۆ پروسەستى جابىق وتكىزۋدى سۇرادى. ول ءىس ماتەريالدارىندا ءوز قورعالۋشىسى مەن مارقۇم قىزدىڭ جەكە ومىرىنە قاتىستى مالىمەتتەر بار ەكەنىن العا تارتتى.

«ءىس ماتەريالدارىندا مەنىڭ قورعالۋشىم مەن جابىرلەنۋشىگە قاتىستى ينتيمدىك سيپاتتاعى مالىمەتتەر، جەكە حات الماسۋلار بار. سوندىقتان سوت وتىرىسىن جابىق تۇردە وتكىزۋدى سۇرايمىن»، — دەدى تۇبەكوۆ.

سۋديا ءوتىنىشتى قاناعاتتاندىرىپ، جۋرناليستەردەن زالدان شىعۋدى سۇرادى. ال مارقۇمنىڭ تۋىستارى، كەرىسىنشە، ب ا ق وكىلدەرىنىڭ پروسەسكە قاتىسۋىنا رۇقسات بەرۋدى وتىنگەن.

قايعىلى وقيعا وتكەن جىلدىڭ قىركۇيەگىندە بولعان. ساعات 22:00 شاماسىندا ۋچاسكەلىك پوليسيا قىزمەتكەرىنىڭ كابينەتىنەن 23 جاستاعى قىزدىڭ جالاڭاش دەنەسى تابىلدى. كورشى كابينەتتە 36 جاستاعى پوليسيا مايورى ەسىنەن تانىپ جاتقان.

كتك حابارلاۋىنشا، ول كەزدە پوليسەي مەن قىز ەسىرتكى قولدانىپ، ەسىرتكى زاتتارىنان ۋلانۋى مۇمكىن دەگەن اقپارات تاراعان. سونداي-اق مارقۇمنىڭ تىرەك پۋنكتىنە بىرنەشە رەت كەلگەنى ايتىلعان. تەلەارنانىڭ دەرەگىنشە، پوليسيا باسشىلىعى بۇل مالىمەتتەردى راستاعان دا، جوققا شىعارعان دا جوق.

ۋچاسكەلىك قىزمەتكەر ەسىن جيعان سوڭ، ونى جۇمىستان شىعارىپ، وقشاۋلاعىشقا قامادى.

مارقۇمنىڭ بەس جاسار ۇلى قالدى. ونىڭ جاقىندارى بۇرىنعى پوليسەي قىزمەت بابىن پايدالاندى دەپ ەسەپتەپ، وتەماقى تالاپ ەتىپ وتىر.

«ول اناسىنىڭ رۇقساتىنسىز ەشقايدا شىعا المايتىن. ول قىزدى شاقىرىپ الىپ، وسىنداي حالگە جەتكىزدى. بالكىم، ونى پايدالانىپ، ونداي ارەكەتتەر جاساعان شىعار. وتەماقى تولەسىن. بالا جەتىم قالدى، كۇن سايىن اناسىن ىزدەپ جىلايدى»، — دەدى مارقۇمنىڭ تۋىسى.

وقيعادان كەيىن قاراعاندىنىڭ بىرنەشە پوليسيا قىزمەتكەرى مەن وبلىستىق دەپارتامەنتتىڭ قىزمەتكەرلەرى تارتىپتىك جاۋاپكەرشىلىككە تارتىلدى. ولارعا قاتاڭ سوگىس بەرىلىپ، اۋداندىق پوليسيا ءبولىمىنىڭ باستىعى جۇمىستان شىعارىلدى.

كتك مالىمەتىنشە، قىلمىستىق ءىس قك-نىڭ 370-بابى — «قىزمەتتە ارەكەتسىزدىك» بويىنشا قوزعالعان. تەلەارنا اۋىر زارداپتاردى ەسكەرسەك، جازا جەتى جىلعا دەيىن باس بوستاندىعىنان ايىرۋ بولۋى مۇمكىن دەپ حابارلايدى.

مارقۇمنىڭ اناسى سوتتالۋشىعا تىم جەڭىل جازا تاعايىندالۋىنان قورقادى. ءارى قارايعى تالقىلاۋ جابىق ەسىك جاعدايىندا وتەدى.