قاراعاندىدا پوليسيانىڭ بۇرىنعى مايورىنا قاتىستى جابىق سوت وتىرىسى باستالدى. تەرگەۋ دەرەگىنشە، ءبىر جىل بۇرىن ونىڭ كابينەتىنەن 23 جاستاعى قىزدىڭ دەنەسى تابىلعان، دەپ حابارلايدى infohub.kz سايتى.
كتك تەلەارناسىنىڭ مالىمەتىنشە، وسىناۋشۋلى ءىس قوعامدا كەڭ رەزونانس تۋدىردى. سوت الدىنا پوليسيانىڭ بۇرىنعى وفيسەرى ءتۇستى. ءبىر جىل بۇرىن ول جۇمىس ورنىندا كوما كۇيىندە تابىلسا، كورشى بولمەدەن 23 جاستاعى قىزدىڭ ءمايىتى تابىلعان. الدىن الا نۇسقا بويىنشا، وقيعاعا قاتىسقان ەكى ادام دا ەسىرتكىدەن اۋىر ۋلانىپ قالعان.
بۇل ءىس بويىنشا تەرگەۋ ءبىر جىلعا سوزىلىپ، ەندى ماتەريالدار رەسمي تۇردە سوت ورگاندارىنا جىبەرىلدى. وتىرىستى جابىق ەسىك جاعدايىندا وتكىزۋگە شەشىم قابىلداندى.
سوتتىڭ العاشقى وتىرىسىنا قازا تاپقان قىزدىڭ اناسى مەن اپايى كەلدى. وتباسىنىڭ مۇددەسىن ءىس بارىسىندا وبلىستىق پروكۋراتۋرا قورعاپ وتىر.
وتىرىس رەسمي باستالماي تۇرىپ، ەكس-پوليسەيدىڭ ادۆوكاتى اسەت تۇبەكوۆ پروسەستى جابىق رەجيمدە وتكىزۋ تۋرالى ءوتىنىش جاسادى. ول ماتەريالداردا جەكە حات الماسۋلار مەن ينتيمدىك سيپاتتاعى مالىمەتتەر بار ەكەنىن، ولاردىڭ جاريا بولۋى قاجەت ەمەستىگىن ءتۇسىندىردى. سوتتالۋشى مارقۇممەن اراداعى قارىم-قاتىناسىنىڭ بولشەكتەرى جاريا ەتىلۋىنە قارسى شىقتى. سۋديا بۇل ءوتىنىشتى قاناعاتتاندىرىپ، ءباسپاسوزدى زالدان شىعارۋعا مىندەتتەدى.
ەسكە سالايىق، قاراعاندىداعى پوليسيانىڭ ءبىر تىرەك پۋنكتىنەن قىزدىڭ دەنەسى مەن ەسىنەن تانىپ قالعان ۋچاسكەلىك ينسپەكتور تابىلعان بولاتىن. كەيىن ىشكى ىستەر ۆيسە-مينيسترى سانجار ءادىلوۆ قاراعاندى پوليسيا پۋنكتىنەن قىزدىڭ دەنەسى مەن ەسىنەن تانىپ قالعان ۋچاسكەلىك ينسپەكتوردىڭ تابىلعانى تۋرالى جاڭالىققا پىكىر ءبىلدىردى. ال ءىىم باسشىسى بۇل وقيعانى «ۇيات» دەپ اتادى. 2025 جىلدىڭ قاراشاسىندا پوليسەيگە كۋاگەر مارتەبەسى بەرىلگەنى بەلگىلى بولدى.