قاشاعاندا گاز وڭدەيتىن زاۋىت سالىپ جاتقان GPCI جوبالاۋ كومپانياسىنداعى 75 پايىز ۇلەستى كاتارلىق UCC Holding-كە ساتۋ ەكى جىلعا سوزىلىپ كەتتى: مامىلەنى 2024 جىلى اياقتاۋ جوسپارلانعان ەدى، ءبىراق ول ءالى جۇزەگە اسپادى، دەپ حابارلايدى infohub.kz سايتى.
«سامۇرىق-قازىنا» حولدينگى جارتىجىلدىق ەسەبىندە GPCI جوبالاۋ كومپانياسىنداعى 75 پايىز ۇلەستى ساتىپ، وزىندە 25 پايىزدى قالدىرۋدى جوسپارلاپ وتىرعانىن كورسەتتى. بۇل قاتار مەن قازاقستان اراسىنداعى ستراتەگيالىق كەلىسىمدە قاراستىرىلعان. ەندى ساتۋدى 2026 جىلدىڭ سوڭىنا دەيىن اياقتاۋدى كوزدەپ وتىر.
كاتار تاراپىمەن كەلىسىم 2024 جىلدىڭ اقپانىندا قازاقستان پرەزيدەنتى قاسىم-جومارت توقاەۆتىڭ اراب ەلىنە ساپارى كەزىندە جاسالعان بولاتىن. سوندا QazaqGaz بەن كاتارلىق UCC Holding قاشاعاندا جىلىنا 1 ملرد تەكشە مەتر جانە 2،5 ملرد تەكشە مەتر قۋاتتىلىقتاعى ەكى گاز وڭدەۋ زاۋىتىن بىرلەسىپ سالۋعا كەلىسكەن.
GPCI كومپانياسى سولاردىڭ ەكىنشىسىن — كەن ورنىنان شىعاتىن ىلەسپە گازدى وڭدەۋگە ارنالعان جىلىنا 2،5 ملرد تەكشە مەتر قۋاتتىلىقتاعى گاز وڭدەۋ زاۋىتىن جوبالاۋمەن جانە سالۋمەن اينالىسادى.
بىرلەسكەن جوبانى جۇزەگە اسىرۋ ءۇشىن GPCI-دەگى باقىلاۋ ۇلەسىن UCC Holding-كە ساتۋ كەرەك ەدى. باستاپقىدا مامىلەنى 2024 جىلدىڭ سوڭىنا دەيىن جابۋ جوسپارلانعان، كەيىن 2025 جىلدىڭ ورتاسى دەپ حابارلانعان، الايدا كومپانيا كاتارلىقتارعا ءالى ساتىلعان جوق.
«اكتيۆتى العاشقى رەت ساتۋعا ارنالعان توپ رەتىندە جىكتەگەن كۇننەن باستاپ 12 اي ىشىندە ساتۋ اياقتالمادى. بۇل ەڭ الدىمەن مامىلەنىڭ ۇكىمەتارالىق سيپاتىنا جانە ساتىپ الۋشىمەن كەيبىر كوممەرسيالىق جانە شارتتىق ماسەلەلەر بويىنشا جالعاسىپ جاتقان كەلىسسوزدەرگە بايلانىستى»، — دەلىنگەن «سامۇرىق-قازىنا» ەسەبىندە.
حولدينگ كاتارلىقتارمەن كەلىسسوزدەر ءالى جالعاسىپ جاتقانىن اتاپ ءوتتى. ەسەپكە سايكەس، ساتۋعا ارنالعان GPC Investment اكتيۆتەرى ماۋسىمنىڭ سوڭىندا 363،6 ملرد تەڭگەگە باعالاندى. ال مىندەتتەمەلەرى 247،8 ملرد تەڭگەنى قۇرايدى. وسىلايشا، ساتۋعا جىكتەلگەن تازا اكتيۆتەر 115،8 ملرد تەڭگەگە باعالانىپ وتىر، مۇنى كومپانيانىڭ قۇنى دەپ ەسەپتەۋگە بولادى.
GPC Investment زاۋىتتى ىسكە قوسپاعانىنا قاراماستان، 2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا 9،2 ملرد تەڭگە پايدا تاپتى. ول 10 ملرد تەڭگە كولەمىندەگى وڭ باعامدىق ايىرما ەسەبىنەن قالىپتاستى.
ايتا كەتەيىك، قاشاعانداعى زاۋىتتىڭ قۇرىلىسى ءىس جۇزىندە تەك 2026 جىلدىڭ جازىندا باستالدى. جوبانىڭ EPC-مەردىگەرلەرى، ياعني جوبالاۋ، جەتكىزۋ جانە قۇرىلىس كەزەڭدەرىندەگى تولىق سيكلدى مەردىگەرلەر رەتىندە قىتايدىڭ ەكى كومپانياسى — China National Chemical Engineering Sixth Construction Company جانە China Wuhuan Engineering Corporation تاڭدالدى. ەكى كومپانيا دا جۇڭگو ۇلتتىق حيميالىق ينجەنەرلىك كورپوراسياسىنىڭ (CNCEC) قۇرامىنا كىرەدى.