ىشكى ىستەر ۆيسە-مينيسترى يگور لەپەحا ۇكىمەتتەگى بريفينگتە 13 تامىزداعى اقاۋلىق كەزىندە جۇرگىزۋشىلەرگە اۆتوماتتى تۇردە جازىلعان ايىپپۇلداردىڭ تاعدىرى تۋرالى سۇراققا جاۋاپ بەردى، دەپ حابارلايدى infohub.kz سايتى.
جۋرناليستەر قازاقستاندىقتاردىڭ اۆتوماتتى تىركەۋ كامەرالارى جازىپ بەرگەن نەگىزسىز ايىپپۇلدارعا بىرنەشە رەت شاعىمدانعانىن اتاپ ءوتتى.
«ونداي جاعداي بولدى، راس. ءبىراق بۇل جاپپاي ەمەس، جەكەلەگەن وقيعالار ەدى. كامەرالار سانى ارتىپ، نۇسقامالار كوبەيىپ جاتىر، ال اكىمشىلىك پوليسيا قىزمەتكەرلەرىنىڭ شتاتى وسپەيدى. ءبىز باس پروكۋراتۋرانىڭ قۇقىقتىق ستاتيستيكا كوميتەتىمەن بىرلەسىپ، اۆتوماتتى قول قويۋ رەجيمىنە كوشتىك. ياعني، بۇرىن نۇسقاما بىلاي جاسالاتىن: قىزمەتكەرگە فوتو كەلىپ، ول نۇسقامانى قاراپ، سودان كەيىن عانا قول قويىپ جىبەرەتىن. ال ءقازىر ءبارى اۆتوماتتى تۇردە جاسالادى. ءقازىر نۇسقاما جقە بۇزعان كولىك يەسىنە بىردەن جىبەرىلەدى»، — دەدى لەپەحا.
ونىڭ ايتۋىنشا، جاڭا نىسان 13 تامىزدا ىسكە قوسىلعان.
«العاشقى كۇنى شىنىمەن دە اقاۋلىقتار تىركەلدى. ولار الماتى جانە جامبىل وبلىستارىندا بايقالدى. قاراپ، انىقتادىق: نۇسقامادا ورتاشا جىلدامدىق ەمەس، لەزدىك جىلدامدىق كورسەتىلگەن. ياعني، نۇسقامادا بەلگىلى ءبىر اركالار كورسەتىلسە، مۇندا سول اركادا جىلدامدىقتى بۇزدى دەپ جازىلعان. ءار جۇرگىزۋشىمەن جەكە جۇمىس ىستەپ جاتىرمىز. ەگەر نۇسقاما شىنىمەن بۇزۋشىلىقپەن راسىمدەلسە، اقشا (بۇگىنگە دەيىن تولەنگەن ايىپپۇل — رەد. ەسك.) بيۋدجەتتەن قايتارىلادى»، — دەپ ءتۇسىندىردى ۆيسە-مينيستر.
ەسكە سالايىق، تامىزدا قازاقستاندا تاس جولداردا جىلدامدىق ءۇشىن قاتە راسىمدەلگەن ايىپپۇلدار انىقتالعان. ىشكى ىستەر مينيسترلىگىندە ولاردىڭ اۆتوماتتى تۇردە جويىلاتىنىن، ال اقشانى قايتارۋ تەتىگى ازىرلەنىپ جاتقانىن مالىمدەدى.