قاي مامان دا تاپسا ومىردەن تۇراعىن،
ءبارىنىڭ دە ۇستازى - ءسىز، ءمۇعالىم!

مۇعالىمدەر
مۇعالىمدەر - ۇستاز اتتى اڭسار ءان،
جاندار سولار ءبىلىم ءۇشىن جار سالعان،
جاندار سولار قىركۇيەگىندە كوش تۇزەپ،
ءتول مەيرامىن قۋانىشپەن قارسى العان!

مۇعالىمدەر، ءتالىم، تانىم سوزدەرى،
سول ارقىلى كەلەشەكتى كوزدەدى.
ماماندىعى مارتەبەلى بولسا دا،
كىشىكتىكپەن ءومىر سۇرگەن وزدەرى.

مۇعالىمدەر - شاكىرتتەگى وتتى ارمان،
سونىسىمەن كەۋدەلەردە جاتتالعان.
ۇزدىكتەرىن ۇلى جولعا شىعارىپ،
ال وزدەرى قاراپايىم بوپ قالعان.

مۇعالىمدەر بىلىمگە اسقاق كەنەلگەن،
شاكىرت كەۋدە سول ارقىلى ەلەنگەن.
بي بيلەسە، ءان سالسا ولار - ونەرپاز،
تۇلابويىن كەندە ەتپەگەن ونەردەن.

مۇعالىمدەر ەڭبەكپەن كۇن وتكەرگەن،
سىرلاس جانى كۇزى، قىسى، كوكتەممەن.
مىنا ومىردە ارۋ دەۋگە لايىق -
كوپشىلىگى نازىك جاندار بوپ كەلگەن.

مۇعالىمدەر داق تۇسىرمەس سەنىمگە،
ۇستاز بولىپ قالار ماڭگى كوڭىلدە.
جاندار ولار شاكىرتى وزىق بولسىن دەپ،
ءوز تىرلىگىن ۇمىتاتىن ومىردە.

مۇعالىمدەر، جاس شىبىققا سەنگەن شىن،
سولار ءۇشىن مىنا ومىرگە كەلگەنسىڭ.
سوندىقتان دا جاڭا عاسىر، وتاننىڭ
تىرەگى دە، تىلەگى دە - سەندەرسىڭ!

كەشەگى ۇستاز - وسى، ىزەتپەن سالەم بەر
(زەينەتكەر ۇستازدارعا ارناۋ)
عاسىرى جاس، زامانى اسقاق ورەندەر،
ءار سات سايىن جاڭالىققا ەلەڭدەر.
اجە كورسەڭ، نەمەرە بار جانىندا،
كەشەگى ۇستاز - وسى، ىزەتپەن سالەم بەر.

ارمان جولمەن بولاشاققا قادام باس،
سوندا قوعام ساعان دا ءمىن تاعا الماس.
كەشەگى ۇستاز - ساليقالى قارت كورسەڭ،
بۇرىلا كەت، ىلتيپاتپەن امانداس.

بولاشاققا ارتىپ بارلىق سەنىمىن،
ولار تەككە وتكەرگەن جوق ءومىرىن.
مەكتەبىمەن بىرگە جىلدار جاساسىپ،
قۇرمەتىن كورگەن تالاي ەلىنىڭ.

جاندار ەمەس بوسقا ۋاقىت وتكەرگەن،
بار ءومىرى بالا، شاكىرت دەپ كەلگەن.
ولار كەشە جاساي العان ۇلىلىق،
ءبىلىم بەرىپ قارا تاقتا، اق بورمەن.

ولار سەنىڭ اتاڭدى دا وقىتقان،
ولار سەنىڭ اناڭدى دا وقىتقان.
قارايلاساڭ سولار جۇرگەن وتكەنگە،
ءتالىم العان اعاڭ-داعى، اپكەڭ دە.
سولار ايتار، جاس كوڭىلىڭ سەنبەسە،
ساعان دا ۇستاز - وسى جاندار، ەندەشە.

ولار دا اسقاق ءبىلىم جولىن ءان قىلعان،
ءتالىم العان تالاي-تالاي بالدىرعان.
جاندار ولار ماعىنالى ءومىرىن
مەكتەبىندە شەجىرە ەتىپ قالدىرعان.

بىرگە جاساپ ءومىر-جولدا مەكتەپپەن،
وتكەن تالاي سىناقتاردان، وتپەكتەن.
بۇگىن، مىنە، شاكىرتتەرى ولاردىڭ
وزدەرى اتا، وزدەرى اجە بوپ كەتكەن.

بولاشاققا وتكەنىڭمەن قادام باس،
كورىنسە دە ءوز زامانىڭ ساعان جاس.
كەشەگى ۇستاز - وسى، ىزەتپەن سالەم بەر،
كەشەگى ۇستاز - وسى، ۇرپاق، امانداس.


مۇعالىمدەر كۇنى بۇگىن
مۇعالىمدەر كۇنى بۇگىن، كۇنى ۇستازدىڭ شاتتانعان،
شاكىرتىنە دەم بەرگىزگەن، جەتكىزەدى دەپ باققا ارمان.
ۇستازداردىڭ كۇنى بۇگىن، بار تىلەگى ومىردە
سول شاكىرتتىڭ ورگە جۇزگەن ەڭبەگىمەن اقتالعان.

مۇعالىمدەر كۇنى بۇگىن، شاتتىق كۇيگە كەنەلگەن،
ۇستاز جۇرەك سىرلاس ءار كەز ءبىلىم اتتى ونەرمەن.
ولار شاكىرت كەۋدەلەرگە سول بىلىمنەن ءنار قۇيىپ،
ءومىر جولدا ىزگىلىكتى ەڭبەگىمەن ەلەنگەن.

تويلاناتىن ءار جىل سايىن، قازان ايى تۋعاندا،
ۇستازداردىڭ مەيرامى وسى، تولى ءان مەن جىرلارعا.
توردەگى ورىن سىزگە، ۇستاز، ءتور سىزدىكى، ءمۇعالىم!
بارلىق جان دا سونى قالار، ۇستاز كوڭىل تۇرعاندا.

مۇعالىمدەر كۇنى بۇگىن، كوڭىلگە بار سىيلارى،
شاكىرتتەرى ولارعا گۇل، ءان دە، جىر دا سىيلادى.
تەك ۇستازدىڭ مەرەكەسى ەمەس بۇگىن، شىنىندا،
سول ۇستازدان ءتالىم كورگەن بارلىق جاننىڭ مەيرامى!


اۆتورى:
عابيدەن قوجاحمەت،
قىزىلوردا قالاسى