قازاقستاندىق جاڭا فيلمدەردىڭ كينوپويسكىدەگى اياسىن كەڭەيتۋ ماسەلەسى مادەنيەت جانە اقپارات ءمينيسترى ارمان قىرىقبايەۆ پەن Yango Group باس ديرەكتورى دانييل شۋلەيكونىڭ كەلىسسوزدەرىنىڭ تاقىرىبىنا اينالدى. بۇل تۋرالى مادەنيەت جانە اقپارات مينيسترلىگى حابارلادى، دەپ جازادى infohub.kz سايتى.
كەزدەسۋ بارىسىندا كينوپرەمەرلەردى اقپاراتتىق قولداۋ، سونداي-اق وتاندىق تۋىندىلاردى پلاتفورمانىڭ تاقىرىپتىق توپتامالارى مەن ۇسىنىمدارىنا قوسۋ ماسەلەلەرى تالقىلاندى. قازاقستاندىق كينونى سيفرلىق الاڭداردا ىلگەرىلەتۋ سۇحباتتىڭ نەگىزگى تاقىرىپتارىنىڭ بىرىنە اينالدى.
سونىمەن قاتار تاراپتار كرەاتيۆتى يندۋستريالار، سيفرلىق تەحنولوگيالار، جاساندى ينتەللەكت جانە ءبىلىم بەرۋ سالاسىنداعى ىنتىماقتاستىقتى دا ءسوز ەتتى. اتاپ ايتقاندا، قاراقشىلىقپەن كۇرەس جانە اۆتورلىق قۇقىقتى قورعاۋ جونىندەگى زاڭنامالىق باستامالاردى بىرلەسىپ ىلگەرىلەتۋ، جاساندى ينتەللەكتتى ونەر مەن كينودا قولدانۋ، كرەاتيۆتى يندۋستريالاردى سيفرلىق ترانسفورماسيالاۋ جانە زاماناۋي سيفرلىق قۇزىرەتتەردى دامىتۋ جايى قوزعالدى.
ءبىلىم بەرۋ سالاسىندا Yandex Qazaqstan ساراپشىلارى مەن تالىمگەرلەرىنىڭ كرەاتيۆتى يندۋستريالاردى دامىتۋ قورىنىڭ ءىس-شارالارىنا قاتىسۋ مۇمكىندىگى قاراستىرىلدى.
ارمان قىرىقبايەۆ سونداي-اق Yandex Qazaqstan-نىڭ «Creative Qazaqstan» جوباسىنىڭ «حابار» جانە «Qazaqstan» تەلەارنالارىندا جۇزەگە اسىرىلىپ جاتقانىن اتاپ ءوتتى. جوبا قازاقستاننىڭ زاماناۋي كرەاتيۆتى ەكونوميكاسىنا ارنالعان.
كەزدەسۋ قورىتىندىسى بويىنشا تاراپتار كينو، كرەاتيۆتى يندۋستريالار، جاساندى ينتەللەكت، سيفرلىق ءبىلىم بەرۋ جانە قازاقستاندىق كونتەنتتى ىلگەرىلەتۋ سالاسىنداعى ودان ءارى ىنتىماقتاستىققا مۇددەلى ەكەنىن راستادى.
بۇعان دەيىن «كۋرسيۆ» قازاقستاندىق كوممەرسيالىق كينونىڭ تىلدىك قۇرىلىمى قالاي وزگەرگەنىن تالداعان بولاتىن: 2000-جىلدارى باسىم تۇردە ورىس ءتىلدى تۋىندىلاردان 2020-جىلداردىڭ ورتاسىنداعى تابىستى قازاق ءتىلدى رەليزدەرگە دەيىن. سونىڭ ءبىر مىسالى — «جۇماقتان بيلەت»: فيلم 2021 جىلى ورىس تىلىندە ءتۇسىرىلىپ، 2026 جىلى پروكاتقا شىعار الدىندا قازاق تىلىنە قايتا دىبىستالدى.