الماتىدا قازاقستان-قىتاي بيزنەس-فورۋمى اياسىندا پرەزيدەنت قاسىم-جومارت توقاەۆتىڭ قاتىسۋىمەن ەلىمىزدە ءارقايسىسى 500 مۆت بولاتىن ەكى جەل ەلەكتر ستانسياسىن سالۋ تۋرالى كەلىسىمگە قول قويىلدى. قۇجات «سامۇرىق-قازىنا» قۇرامىنا كىرەتىن «سامۇرىق-ەنەرگو» كومپانياسى مەن قىتايلىق China Energy Overseas Investment Co.، Ltd. جانە SANY Renewable Energy Co.، Ltd. اراسىنداعى ۋاعدالاستىقتى بەكىتتى، دەپ حابارلايدى infohub.kz سايتى.
قۇجاتقا «سامۇرىق-ەنەرگو» باسقارما ءتوراعاسى قايرات ماقسۇتوۆ، China Energy Overseas Investment Co.، Ltd. ۆيسە-پرەزيدەنتى لي ياحۋن جانە SANY Renewable Energy Co.، Ltd. شەتەلدىك ينۆەستيسيالار جونىندەگى باس ديرەكتورى تان چاو قول قويدى.
جوبا 500 مۆت-تان ەكى جەل ەلەكتر ستانسياسىن، ءارقايسىسىنىڭ قۋاتى 150 مۆت جانە سىيىمدىلىعى 300 مۆتساع بولاتىن ەكى ەنەرگيا جيناقتاۋ جۇيەسىن، سونداي-اق جالپى ۇزىندىعى شامامەن 800 كم بولاتىن 500 كۆ جوعارى ۆولتتى جەلىلەردى «اقتوعاي» جانە «تالدىقورعان» قوسالقى ستانسيالارىنا قوسۋعا ارنالعان. الاڭ جەتىسۋ وبلىسىندا ورنالاسادى. كەلىسىم ءۇش جىلعا جاسالىپ، ۇزارتۋ مۇمكىندىگى قاراستىرىلعان.
سونىمەن قاتار اقمولا وبلىسىنىڭ اكىمى مارات احمەتجانوۆ پەن SUNGROW Renewable Development Co.، Ltd. كومپانياسىنىڭ ورتالىق ازياداعى بيزنەستى دامىتۋ جونىندەگى ديرەكتورى سيۋ مين فەنگ وڭىردە جالپى قۋاتى 450 مۆت بولاتىن جەل ەلەكتر ستانسيالارى جوبالارىن ىسكە اسىرۋ بويىنشا ىنتىماقتاستىقتى بەكىتۋ تۋرالى كەلىسىمگە قول قويدى.
2025 جىلدىڭ قورىتىندىسى بويىنشا قازاقستاندا وندىرىلەتىن ەلەكتر ەنەرگياسىنىڭ جالپى كولەمىندە جاڭارتىلاتىن ەنەرگيا كوزدەرىنىڭ ۇلەسى 7%-عا جەتتى. رەسپۋبليكا ۇكىمەتى بۇل كورسەتكىشتى 2030 جىلعا قاراي 15%-عا، ال 2050 جىلعا قاراي 50%-عا جەتكىزۋدى مىندەت ەتىپ قويىپ وتىر. الايدا ءقازىر قازاقستاندىق ەلەكتر ەنەرگياسىنىڭ باسىم بولىگى كومىر جاعۋ ارقىلى وندىرىلەدى.