قازاقستاندا Yandex Go سەرۆيستەرى ارقىلى جۇمىس ىستەيتىن ايەل-كۋرەرلەردى قولداۋعا باعىتتالعان پيلوتتىق جوبا باستالادى. قيىن نەمەسە داعدارىستىق ومىرلىك جاعدايعا تاپ بولعان قاتىسۋشىلار كومەك الا الادى، دەپ حابارلايدى infohub.kz سايتى.
ءتيىستى مەموراندۋمعا ەڭبەك جانە حالىقتى الەۋمەتتىك قورعاۋ مينيسترلىگى، Yandex Qazaqstan كومپانياسى جانە «ىسكەر» قولداۋ ورتالىعى قوعامدىق قورى قول قويدى.
جوباعا كەمىندە ءتورت اپتا بويى «تاماق»، Lavka جانە «جەتكىزۋ» سەرۆيستەرى ارقىلى تاپسىرىستاردى ورىندايتىن ايەلدەر قاتىسا الادى. ءبىرىنشى كەزەكتە جالعىزباستى جانە كوپبالالى انالاردىڭ، مۇگەدەكتىگى بار ايەلدەردىڭ، ەرەكشە قاجەتتىلىكتەرى بار بالالاردىڭ انالارىنىڭ، سونداي-اق اۋىر ناۋقاس تۋىستارىنا كۇتىم جاسايتىنداردىڭ وتىنىمدەرى قارالادى.
جاعدايعا بايلانىستى كۋرەرلەرگە زاڭگەرلىك، پسيحولوگيالىق جانە گۋمانيتارلىق كومەك كورسەتىلۋى مۇمكىن. سونداي-اق ولارعا قولجەتىمدى مەملەكەتتىك قولداۋ شارالارى مەن الەۋمەتتىك قىزمەتتەردى تۇسىنۋگە كومەكتەسەدى. كەيبىر جاعدايلاردا مەديسينالىق كومەك الۋعا جاردەمدەسۋ قاراستىرىلعان.
«بۇل جاعدايدا ءبىز جەتكىزۋ سالاسىنداعى جۇمىستى وتباسىلىق مىندەتتەرمەن ۇشتاستىراتىن جانە قيىن ومىرلىك جاعدايعا تاپ بولۋى مۇمكىن ايەلدەر تۋرالى ايتىپ وتىرمىز. مۇنداي جاعدايدا ادامنىڭ قايدا جۇگىنۋ كەرەكتىگىن جانە قانداي كومەك الا الاتىنىن ءتۇسىنۋى ماڭىزدى»، — دەدى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ.
سونىمەن قاتار، جالعىزباستى نەمەسە كوپبالالى انا مارتەبەسى نەمەسە باسقا دا كورسەتىلگەن ساناتقا جاتاتىندىعى كومەك اۆتوماتتى تۇردە كورسەتىلەتىنىن بىلدىرمەيدى. ءاربىر ءوتىنىم جەكە قارالىپ، ناقتى ايەلگە جانە ونىڭ وتباسىنا قانداي قولداۋ قاجەت ەكەندىگى انىقتالادى.
ءوتىنىمدى «ياندەكس پرو» قوسىمشاسى ارقىلى بەرۋگە بولادى — اقپارات «نەگىزگى ىنتىماقتاستىق تۋرالى» بولىمىندەگى «ايەل-كۋرەرلەرگە كومەك» ماقالاسىندا ورنالاسقان. سونداي-اق شارتتاردى سەرۆيستىڭ قولداۋ قىزمەتى ارقىلى بىلۋگە بولادى.
ازىرگە جوبا پيلوتتىق رەتىندە ىسكە قوسىلۋدا. ونىڭ قورىتىندىسى بويىنشا قاتىسۋشىلار مۇنداي كومەكتىڭ قانشالىقتى سۇرانىسقا يە ەكەنىن جانە باعدارلامانى ودان ءارى دامىتۋ كەرەكتىگىن باعالايدى.
بۇعان دەيىن قازاقستاندىق ينتەرنەت-سەگمەنتىندە نارەستەسىن قۇشاقتاپ، تاپسىرىس جەتكىزىپ جۇرگەن ايەلدىڭ فوتوسۋرەتى تالقىلانعان بولاتىن. سۋرەت Threads-تە پايدا بولىپ، الەۋمەتتىك جەلىلەردە تەز تارادى. ايەل كۋرەرلىك ريۋكزاك كيگەن، بالانى الدىندا ۇستاعان.
بۇل وقيعا ۇلكەن رەزونانس تۋدىرعانى سونشالىق، ماسەلە ۇكىمەتتەگى بريفينگتە كوتەرىلدى. جۋرناليستەر ەڭبەك جانە حالىقتى الەۋمەتتىك قورعاۋ ۆيسە-مينيسترى ۆيكتوريا شەگايدان ۆەدومستۆونىڭ كىشكەنتاي بالامەن كۋرەر بولىپ جۇمىس ىستەۋگە ءماجبۇر بولعان ايەلگە قاتىستى ۇستانىمىن سۇرادى.