2026 جىلعى 14 تامىزدا قازاقستاندا سەگىز ءوڭىردى قامتىعان ءىرى ەنەرگيا جۇيەسىندەگى اقاۋ ورىن الدى. تەحنولوگيالىق بۇزىلىس سالدارىنان الماتى، جامبىل، تۇركىستان، قىزىلوردا، قاراعاندى، اباي وبلىستارىنىڭ، سونداي-اق جەتىسۋ جانە ۇلىتاۋ وبلىستارىنىڭ تۇتىنۋشىلارى جارىقسىز قالدى... دەپ حابارلايدى infohub.kz سايتى.
KEGOC كومپانياسىنىڭ ءباسپاسوز قىزمەتىنىڭ مالىمەتىنشە، وقيعا استانا ۋاقىتىمەن ساعات 14:37-دە بولعان. سەبەپ — قىرعىزستانداعى توقتوگۇل سۋ ەلەكتر ستانساسىنداعى ەكى گيدروگەنەراتوردىڭ اجىراۋى. بۇل قازاقستاننىڭ ءبىرىڭعاي ەنەرگيا جۇيەسىندەگى «سولتۇستىك-شىعىس-وڭتۇستىك» ءترانزيتىنىڭ شامادان تىس جۇكتەلۋىنە جانە وڭتۇستىك ايماقتىڭ قازاقستاننىڭ بەج-ىنەن جانە ورتالىق ازيانىڭ بىرىككەن ەنەرگوكەشەنىنىڭ (قىرعىزستان، وزبەكستان، تاجىكستان) ەنەرگيا جۇيەلەرىنەن ءبولىنىپ قالۋىنا اكەلدى.
سالدارىنان اۆارياعا قارسى اۆتوماتتاندىرۋ ىسكە قوسىلىپ، اتالعان وڭىرلەردەگى تۇتىنۋشىلار اجىراتىلدى. ەلەكترمەن جابدىقتاۋدى قالپىنا كەلتىرۋ بىردەن باستالدى: ساعات 14:47-دە KEGOC قاراعاندى، اباي وبلىستارى مەن ۇلىتاۋ وبلىسىندا ەلەكتر قۋاتىن تولىق قالپىنا كەلتىردى. ساعات 16:26-دا الماتى وبلىسى مەن جەتىسۋ وبلىسىنا، ال 16:34-تە جامبىل، تۇركىستان جانە قىزىلوردا وبلىستارىنا ەلەكتر قۋاتى قايتارىلدى.
تەحنولوگيالىق بۇزىلىستىڭ سەبەپتەرىن انىقتاۋ ءۇشىن ارنايى كوميسسيا قۇرىلدى. قازاقستان ەنەرگەتيكا مينيسترلىگىنىڭ مالىمەتىنشە، وقيعانىڭ سەبەبى — ورتالىق ازيا ەنەرگيا جۇيەسى تاراپىنان ەلەكتر قۋاتى اعىنىنىڭ كۇرت وزگەرۋىنەن تۋىنداعان ەنەرگيا جۇيەسىندەگى قۋاتتىڭ ارتۋى.