قازاقستاننىڭ دزيۋدو قۇراماسى ازيادا-2026 ارالاس كوماندالىق تۋرنيرىندە كۇمىس جۇلدەگەر اتاندى. فينالدا وتانداستارىمىز جاپونيا قۇراماسىنا 0:4 ەسەبىمەن جول بەردى. بۇل — قازاقستاندىق دزيۋدوشىلاردىڭ اتالعان ويىندارداعى جەتىنشى مەدالى، دەپ حابارلايدى infohub.kz سايتى.
فينالدىڭ العاشقى بەلدەسۋىندە گۋسمان قىرعىزبايەۆ (73 كگ) جاپونيالىق تاسۋكي يسيحارامەن كەزدەستى. كەزدەسۋ ءتورت مينۋتقا سوزىلىپ، يسيحارا «يۋكو» باعاسىنىڭ ارقاسىندا جەڭىسكە جەتتى.
ەكىنشى بەلدەسۋدە اجار اسحات (70 كگ) تاتاميدە ۋتانا تەرادامەن شەبەرلىك بايقاستى. جاپونيالىق سپورتشى كەزدەسۋدى 3 مينۋت 7 سەكۋندتا «يپپونمەن» اياقتادى.
ءۇشىنشى بەلدەسۋدە ايدار اراپوۆ (90 كگ) حيدەتوسي توكۋموتيگە قارسى الدىمەن «يۋكو» الدى، الايدا كەيىن قازاقستاندىق ءۇش «شيدو» جيناپ، جەڭىس جاپونيالىق دزيۋدوشىعا «يپپونمەن» بەرىلدى.
ءتورتىنشى بولىپ تاتاميگە ايدا تويشىبەكوۆا (78 كەلىدەن جوعارى) شىقتى. ونىڭ قارسىلاسى ميكي مۋكۋنوكي 33 سەكۋندتا «يپپونمەن» جەڭدى.
وسىلايشا، قازاقستان قۇراماسى ازيادا-2026 دزيۋدو ءتۋرنيرىن جەتى جۇلدەمەن اياقتادى: بەس كۇمىس جانە ەكى قولا. جەكەلەي سىندا قازاقستاندىقتار ءتورت كۇمىس پەن ەكى قولا الدى، سودان كەيىن ارالاس كوماندالىق تۋرنيردە كۇمىس مەدال قوستى.
كۇمىس جۇلدەگەرلەر: ەلدوس سمەتوۆ (60 كگ)، ابيبا ابۋجاكىنوۆا (48 كگ)، ادىلەت المات (81 كگ)، اجار اسحات (70 كگ) جانە قازاقستاننىڭ ارالاس قۇراماسى.
قولا مەدالدار: ەسميگۋل كۋيۋلوۆا (63 كگ) جانە ەكاتەرينا توكارەۆا (78 كگ).
تاعى بەس قازاقستاندىق سپورتشى جەكە پوديۋمعا ءبىر قادام جەتپەي توقتادى: گۋسمان قىرعىزبايەۆ، مەرۋەرت سارسەنوۆا، دانا ابديروۆا، مارات بايكامۋروۆ جانە ايدا تويشىبەكوۆا ءوز سالماقتارىندا بەسىنشى ورىن الدى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنادى. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى سىنعا تۇسۋدە.