قازاقستان قورعانىس مينيسترلىگى حالىققا اسكەري كولوننالاردىڭ ەل اۋماعىندا قوزعالۋىنا الاڭداماۋدى سۇراپ، ۇندەۋ جاسادى، دەپ حابارلايدى infohub.kz سايتى.
ۆەدومستۆونىڭ Telegram-ارناسىندا تامىز جانە قىركۇيەك ايلارىندا قازاقستاندا «باتىل تويتارىس - 2026» ستراتەگيالىق كوماندالىق-شتابتىق وقۋ-جاتتىعۋى وتەتىنى حابارلاندى. وسىعان بايلانىستى ەل اۋماعىندا قارۋ-جاراق، اسكەري تەحنيكا جانە جەكە قۇرامدى جاۋىنگەرلىك دايارلىق ءىس-شارالارى وتەتىن اۋداندارعا جىلجىتۋ جۇزەگە اسىرىلادى.
«اسكەردى تاسىمالداۋ ارالاس تاسىلمەن جۇزەگە اسىرىلادى: تەمىرجول ەشەلوندارىمەن، جالپى پايدالانىمداعى جولدارمەن اۆتوموبيل كولوننالارىمەن، سونداي-اق فرونتتىق جانە ارميالىق اۆياسيانى پايدالانۋ ارقىلى»، — دەپ ناقتىلادى ۆەدومستۆودا.
اتاپ وتىلگەندەي، وتكىزىلىپ جاتقان ءىس-شارالار جوسپارلى سيپاتتا جانە اسكەرلەردىڭ جاۋىنگەرلىك دايارلىعىن جەتىلدىرۋگە، اسكەري باسقارۋ ورگاندارىنىڭ، اسكەر تۇرلەرى مەن تەكتەرىنىڭ، ارنايى اسكەرلەردىڭ ءوزارا ءىس-قيمىل دەڭگەيىن ارتتىرۋعا، سونداي-اق قارۋلى كۇشتەردى قولدانۋدىڭ زاماناۋي نىساندارى مەن تاسىلدەرىن پىسىقتاۋعا باعىتتالعان.
«وقۋ-جاتتىعۋ بارىسىندا قۇرلىقتا، اۋە كەڭىستىگىندە، تەڭىزدە جانە كيبەركەڭىستىكتە ءبىرىڭعاي وپەراسيالىق كەڭىستىكتە اسكەرلەردى قولدانۋ جانە ۆەدومستۆوارالىق ءوزارا ءىس-قيمىلدى ۇيىمداستىرۋ ماسەلەلەرى پىسىقتالاتىن بولادى»، — دەپ قوستى مينيسترلىكتە.
وسىعان بايلانىستى ازاماتتاردان سابىر ساقتاۋدى، تەك رەسمي اقپاراتقا سۇيەنۋدى جانە تەكسەرىلمەگەن مالىمەتتەردى تاراتپاۋدى سۇرايدى.