قازاقستاندا رەسپۋبليكالىق جانە وبلىستىق ماڭىزداعى 40 مىڭ كم-دەن استام اۆتوموبيل جولىن ءموبيلدى بايلانىسپەن قامتۋ جوسپارلانىپ وتىر. ول ءۇشىن تراسسالاردا 500-دەن استام انتەننا-ماچتا قۇرىلعىلارى مەن بازالىق ستانسيالار سالىنادى، دەپ حابارلايدى infohub.kz سايتى.
جوبانىڭ ىسكە اسىرىلۋ بارىسى پرەمەر-مينيستردىڭ ورىنباسارى — جاساندى ينتەللەكت جانە سيفرلىق دامۋ ءمينيسترى جاسلان ماديەۆتىڭ توراعالىعىمەن وتكەن كەڭەستە تالقىلاندى. تالقىلاۋعا «ترانستەلەكوم» اق جانە ءموبيلدى وپەراتورلاردىڭ وكىلدەرى قاتىستى.
كەڭەس قاتىسۋشىلارى تەلەكوممۋنيكاسيالىق ينفراقۇرىلىم قۇرىلىسىنىڭ اعىمداعى جاي-كۇيىن، سونداي-اق ينۆەستور مەن بايلانىس وپەراتورلارىنىڭ سالىنىپ جاتقان نىسانداردى بىرلەسىپ پايدالانۋ ماسەلەلەرىن قاراستىردى.
اۆتوموبيل جولدارىندا تۇراقتى راديوجابىندى قامتاماسىز ەتۋگە جانە جوباعا قاتىسۋشىلار اراسىنداعى جۇمىستاردى ۇيلەستىرۋگە ەرەكشە نازار اۋدارىلدى.
رەسپۋبليكالىق تراسسالاردى ءموبيلدى بايلانىسپەن قامتۋ 2026 جىلدىڭ سوڭىنا دەيىن، وبلىستىق جولداردى — 2027 جىلدىڭ سوڭىنا دەيىن اياقتالۋى جوسپارلانىپ وتىر.
جوبانى «ترانستەلەكوم» اق قارجىلاندىرادى. ونى ىسكە اسىرۋ ءۇشىن بيۋدجەتتىك قاراجات تارتۋ جوسپارلانباعان.
بۇعان دەيىن «كۋرسيۆ» جازعانداي، سيفرلىق دامۋ مينيسترلىگى مەن «ترانستەلەكوم» اق قازاقستاننىڭ رەسپۋبليكالىق جانە وبلىستىق تراسسالارىن ينتەرنەتپەن قامتۋعا كەلىسكەن بولاتىن. ول ءۇشىن تۇراقتى بايلانىسى جوق ۋچاسكەلەردى — «اق داقتاردى» انىقتاپ، قاجەتتى تەلەكوممۋنيكاسيالىق ينفراقۇرىلىم سالۋ جوسپارلانعان ەدى.