قازاقستاندا تۇتىنۋ تولەمدەرىنىڭ جالپى كولەمىندەگى قولما-قول اقشانىڭ ۇلەسى 12%-دى قۇرادى. بۇل كورسەتكىش بويىنشا رەسپۋبليكا الەمنىڭ جەتەكشى ەكونوميكالارىمەن ءىس جۇزىندە تەڭەسىپ، ءبىرقاتار دامۋشى نارىقتاردان وزدى. مۇنداي دەرەكتەردى «Fintech in Kazakhstan 2026» ۇلتتىق جىلدىق زەرتتەۋىنىڭ اۆتورلارى كەلتىردى، دەپ حابارلايدى infohub.kz سايتى.
قازاقستان بارلىق تۇتىنۋ تولەمىنىڭ 11%-ى قاعاز اقشاعا تيەسىلى اقش پەن كورسەتكىشى 10% بولاتىن ۇلىبريتانياعا تىم جاقىن ورنالاستى.
قولما-قول اقشانى ەڭ از پايدالاناتىن ەل — نورۆەگيا، وندا نەبارى 4%. ۇزدىك ۇشتىككە بانكنوت پەن مونەتانىڭ ۇلەسى 5%-دان كەلەتىن جۇڭگو مەن شۆەسيا دا كىردى. وڭتۇستىك كورەيادا بۇل كورسەتكىش 7% دەڭگەيىندە تۇر. سونىمەن قاتار قازاقستان وپەراسيالار كولەمىنىڭ 17%-ى ءالى دە قولما-قول ەسەپ ايىرىسۋعا تيەسىلى برازيليادان ايتارلىقتاي وزىپ وتىر.
ينتەرنەت- جانە ءموبيلدى بانكينگ اقشالاي ماندە كوش باستاپ تۇر: جالپى ترانزاكسيا كولەمىنىڭ شامامەن 80%-ىن قامتاماسىز ەتەدى. بۇل — ءىرى ەسەپ ايىرىسۋلار جاساۋدىڭ نەگىزگى ارناسى.
ال QR-تولەمدەر چەك سوماسى از كۇندەلىكتى بولشەك ساۋدا ساتىپ الۋلارىنىڭ باستى قۇرالىنا اينالدى. QR-ترانزاكسيالاردىڭ سانى بويىنشا ۇلەسى شامامەن ەكى ەسە ءوسىپ، جالپى وپەراسيا كولەمىنىڭ 10%-ىن قۇرادى. 2026 جىلدىڭ العاشقى بەس ايىندا QR-تولەمدەر اينالىمى $17 ملرد-قا (8 ترلن تەڭگە) جەتىپ، ەكىنشى جىل قاتارىنان POS-تەرمينالدار كورسەتكىشىنەن ($16 ملرد / 7،5 ترلن تەڭگە) اسىپ ءتۇستى.
«Fintech in Kazakhstan 2026» زەرتتەۋىن RISE Research اگەنتتىگى bcc hub، Fintech Center جانە Tarlan-مەن بىرلەسىپ، قازاقستان رەسپۋبليكاسى ۇلتتىق بانكىنىڭ قولداۋىمەن دايىندادى. تالداۋ جاساۋ بارىسىندا ساراپشىلار ۇلتتىق بانكتىڭ ستاتيستيكاسى مەن Worldpay Global Payments Report 2025 ەسەبىنىڭ دەرەكتەرىنە سۇيەندى.
ەسەپ اۆتورلارى كەلتىرىلگەن ساندار ادىستەمە ايىرماشىلىعىنا بايلانىستى بولجامدى سيپاتتا ەكەنىن ناقتىلايدى: حالىقارالىق ستاتيستيكا POS-تەرمينالدار پروسەسسينگىنىڭ دەرەكتەرى مەن ساۋالنامالاردى ەسكەرەدى، ال قازاقستاندىق كورسەتكىش كارتا وپەراسيالارىنىڭ جالپى قۇنىنداعى قولما-قول اقشاسىز ترانزاكسيالاردىڭ ۇلەسىن بىلدىرەدى.
بۇعان دەيىن «كۋرسيۆ» قازاقستانداعى قولما-قول اقشاسىز تولەمدەر كولەمى قولما-قول اقشامەن جاسالعان مامىلەلەردەن شامامەن 9 ەسە كوپ ەكەنىن جازعان بولاتىن.