2026 جىلدىڭ ءبىرىنشى جارتىجىلدىعىندا قازاقستاندا قولما-قولسىز تولەمدەر كولەمى 5،4%-عا ءوسىپ، 91،2 ترلن تەڭگەگە جەتتى، دەپ حابارلايدى infohub.kz سايتى.
قازاقستان قارجىگەرلەرى قاۋىمداستىعىنىڭ (افك) دەرەكتەرىنە سايكەس، 2026 جىلدىڭ التى ايىندا قولما-قولسىز تولەمدەر كولەمى 91،2 ترلن تەڭگەنى قۇراپ، وتكەن جىلدىڭ سايكەس كەزەڭىمەن سالىستىرعاندا 5،4%-عا ارتقان. ناتيجەسىندە كارتالىق ترانزاكسيالاردىڭ جالپى كولەمىندەگى قولما-قولسىز وپەراسيالاردىڭ ۇلەسى 87%-دان 87،9%-عا دەيىن ءوستى.
وسى ايادا بانكوماتتار ارقىلى قولما-قول اقشا الۋ كولەمى 2،8%-عا ازايىپ، 12،6 ترلن تەڭگەگە ءتۇستى. الۋ وپەراسيالارىنىڭ سانى 4،1%-عا كەمىدى، الايدا ورتاشا الۋ سوماسى 1،3%-عا ءوسىپ، 114،3 مىڭ تەڭگەنى قۇرادى.
ءبىر قىزىعى، قولما-قولسىز وپەراسيالار سانى 6%-عا ءوسىپ، 7 ملرد-قا جەتتى، ال ورتاشا چەك، كەرىسىنشە، 0،7%-عا ازايىپ، 13،1 مىڭ تەڭگە بولدى. ساراپشىلاردىڭ پىكىرىنشە، بۇل قولما-قولسىز تولەمدەردىڭ ءوسۋى ەڭ الدىمەن كارتالار مەن باسقا دا تولەم تاسىلدەرىن ءجيى قولدانۋ ەسەبىنەن قامتاماسىز ەتىلىپ وتىرعانىن كورسەتەدى.
قازاقستاندىقتار QR-تولەمدەردى ءجيى تاڭداي باستادى. نەگىزىنەن قولما-قولسىز تولەم ينتەرنەتتە قولدانىلادى – وعان بارلىق اينالىمنىڭ 79% تيەسىلى. دەگەنمەن QR-تولەمدەردىڭ ۇلەسى 10،2%-دان 10،9%-عا، ال POS-تەرمينالدار (كاسسادا كارتامەن تولەۋ) ۇلەسى 9،6%-دان 10%-عا دەيىن بىرتىندەپ وسۋدە. ەسكە سالايىق، شىلدە ايىنان باستاپ قازاقستاندا بانكارالىق QR-تولەمدەردىڭ ءبىرىڭعاي جۇيەسى، سونداي-اق بانكارالىق ءموبيلدى تولەمدەر جۇيەسىنىڭ سەرۆيسى تولىق كولەمدە جۇمىس ىستەي باستادى. بۇل جاڭاشىلدىقتار ازاماتتاردىڭ قولما-قولسىز ەسەپ ايىرىسۋعا كوشۋىن جەدەلدەتۋى مۇمكىن.