كاسپيدەگى قايعىلى وقيعادان كەيىن الەۋمەتتىك جەلىلەردە قازا تاپتى دەگەن اقپارات تاراعان مەرزىمدىك اسكەري قىزمەتتەگى ەكى ماتروس ءتىرى جانە قىزمەتىن جالعاستىرىپ ءجۇر. قازاقستان قورعانىس مينيسترلىگى ولار وقۋ-جاتتىعۋ كەزىندە جاعالاۋدا مىندەت اتقارعانىن، ءقازىر اسكەري بولىمدە ەكەنىن مالىمدەدى، دەپ حابارلايدى infohub.kz سايتى.
ءسوز مەرزىمدىك اسكەري قىزمەتتەگى احمەتوۆ پەن ماعاۋيا ەسىمدى ماتروستار تۋرالى بولىپ وتىر. قورعانىس ۆەدومستۆوسى بۇل اسكەري قىزمەتشىلەردىڭ 24 قىركۇيەكتەگى قايعىلى وقيعا كەزىندە قايدا بولعانىن ناقتىلادى.
«مەرزىمدىك اسكەري قىزمەتتەگى ماتروستار احمەتوۆ ا.ا. جانە ماعاۋيا ءا.ا. جاعالاۋدا وقۋ مىندەتتەرىن ورىنداعان اسكەري قىزمەتشىلەر توبىنا جاتتى. قازىرگى تاڭدا اتالعان اسكەري قىزمەتشىلەر اسكەري ءبولىم ورنالاسقان جەردە جانە كۇن تارتىبىنە سايكەس قىزمەت اتقارىپ ءجۇر»، — دەدى قورعانىس مينيسترلىگى.
مينيسترلىك ازاماتتاردى تەكسەرىلمەگەن دەرەكتەردى تاراتپاۋعا جانە تەك رەسمي اقپاراتقا سۇيەنۋگە شاقىردى.
ۆەدومستۆونىڭ مالىمدەمەسى الەۋمەتتىك جەلىلەردە پايدالانۋشىلار 24 قىركۇيەكتەگى وقۋ-جاتتىعۋعا قاتىسى بار دەپ تۇجىرىمداعان اسكەري قىزمەتشىلەر ءتىزىمىن تالقىلاۋ اياسىندا جاسالدى.
اتاپ ايتقاندا، Threads پايدالانۋشىلارىنىڭ ءبىرى ءتىزىمنىڭ سۋرەتىن جاريالاپ، اسكەري قىزمەتشىلەردىڭ تەگىنە قارسى قويىلعان بەلگىلەردەگى سايكەسسىزدىككە نازار اۋداردى.
«بۇل پوستتى وشىرۋگە ماجبۇرلەيتىنىن بىلمەيمىن، ءبىراق جازامىن. بۇل — 24 قىركۇيەكتە كاتەردە بولعان اسكەري قىزمەتشىلەردىڭ ءتىزىمى. ءبىر قاراعاندا ەرەكشە ەشتەڭە جوق، ءبىراق تىزىمدە گۋماروۆ مانسۋر «200» دەپ بەلگىلەنگەن، ال اقجايىق پەن ولجاسقا «بەلگىسىز» دەپ قويىلعان. الايدا 24 قىركۇيەكتە اقجايىق پەن ولجاستىڭ دەنەسى تابىلىپ، ولاردىڭ قازا تاپقانى بەلگىلى بولدى، ال مانسۋر تەك 25 قىركۇيەكتە شامامەن 09:15-تە تابىلدى. سۇراق تۋىندايدى: دەنەسى كەيىنىرەك تابىلعان مانسۋردىڭ قازا تاپقانى بەلگىلى بولىپ، ال ءبىر كۇن بۇرىن تابىلعان اقجايىق پەن ولجاستىڭ مارتەبەسى بەلگىسىز بولىپ قالعانى قالاي؟» — دەپ جازدى جاريالانىم اۆتورى.
بۇعان دەيىن «كۋرسيۆ» كاسپيدەگى اسكەريلەرمەن بولعان قايعىلى وقيعا تۋرالى جالعان اقپارات تاراتقانداردى پوليسيا جازالاعانىن جازعان.
ەسكە سالايىق، 24 قىركۇيەكتە ماڭعىستاۋ وبلىسىندا وقۋ-جاتتىعۋ كەزىندە 17 اسكەري قىزمەتشى كاسپي تەڭىزىنە اعىتىلىپ كەتىپ، ولاردىڭ 14ء-ى قازا تاپتى. قايعىلى وقيعانىڭ ءمان-جايىن ۆيسە-پرەمەر قانات بوزىمبايەۆ باسقاراتىن ارنايى ۇكىمەتتىك كوميسسيا تەرگەپ جاتىر.
بۇعان دەيىن «كۋرسيۆ» تەڭىزشىلەردىڭ قازا تابۋىنا قاتىستى ءىس بويىنشا قازاقستان قورعانىس مينيسترلىگىنىڭ بەس وفيسەرى ۇستالعانىن حابارلاعان. سالاقتىق جانە كەمە جۇرگىزۋ ەرەجەلەرىن بۇزۋ باپتارى بويىنشا قوزعالعان قىلمىستىق ءىس باس پروكۋراتۋرانىڭ ەرەكشە باقىلاۋىندا.
25 قىركۇيەك ۇلتتىق ازا تۇتۋ كۇنى دەپ جاريالاندى.
27 قىركۇيەكتە قازاقستان پرەزيدەنتى قاسىم-جومارت توقايەۆ قازا تاپقان تەڭىزشىلەردى باۋىرجان مومىش ۇلى اتىنداعى «ايبىن» II دارەجەلى جانە راحيمجان قوشقاربايەۆ اتىنداعى «ايبىن» III دارەجەلى وردەندەرىمەن قايتىس بولعاننان كەيىن ماراپاتتادى. ءتىرى قالعان ءۇش اسكەري قىزمەتشىنى مەملەكەت باسشىسى «ەرلىگى ءۇشىن» مەدالىمەن اتاپ ءوتتى.