قازاقستان سىرتقى ىستەر مينيسترلىگى قارا تەڭىز اكۆاتورياسىندا 17 جانە 19 شىلدەدە بولعان ازاماتتىق كەمەلەرگە جاسالعان ۇشقىشسىز ۇشاق شابۋىلدارىن قاتاڭ ايىپتادى. بۇل كەمەلەر كاسپي قۇبىر كونسورسيۋمىنىڭ ينفراقۇرىلىمى ارقىلى مۇنايدى زاڭدى تاسىمالداۋعا قاتىستى، دەپ حابارلايدى infohub.kz سايتى.
ۆەدومستۆو مالىمدەمەسىندە قازاقستان مۇنداي شابۋىلداردى ەلدىڭ ەكونوميكالىق مۇددەلەرىنە جول بەرىلمەيتىن قولسۇعۋشىلىق، سونداي-اق زاڭدى حالىقارالىق ساۋدا، الەمدىك ەنەرگەتيكالىق نارىقتار مەن جاھاندىق كولىك-لوگيستيكالىق جەتكىزۋ تىزبەكتەرىنىڭ قاۋىپسىزدىگىن تۇراقسىزداندىرۋعا باعىتتالعان ارەكەتتەر دەپ باعالايتىنى اتاپ ءوتىلدى.
"ءبىزدىڭ ەرەكشە الاڭداۋشىلىعىمىزدى تۋدىراتىنى – قارا تەڭىز اكۆاتورياسىنا كتك تەرمينالدارىندا مۇناي تيەۋ ماقساتىندا كىرەتىن ازاماتتىق كەمەلەر تۋرالى اقپارات الماسۋدىڭ بۇرىن بارلىق مۇددەلى تاراپتار كەلىسكەن تەتىگى ادەيى ەلەنبەي قالدى، بۇل ازاماتتىق كەمەلەر ەكيپاجدارىنىڭ ءومىرى مەن قاۋىپسىزدىگىنە قاتەر ءتوندىردى"، – دەلىنگەن مالىمدەمەدە.
ءسىم قازاقستان شابۋىلداردى دەرەۋ توقتاتۋدى جانە قازاقستاندىق كومىرسۋتەك شيكىزاتىن ەكسپورتتاۋ ينفراقۇرىلىمىنىڭ قاۋىپسىزدىگىن قامتاماسىز ەتۋ ءۇشىن تولىق شارالار قابىلداۋدى تالاپ ەتەتىنىن جەتكىزدى.
سونىمەن قاتار، رەسپۋبليكا سەرىكتەس ەلدەردى بولعان شابۋىلداردى قاتاڭ ايىپتاۋعا شاقىردى جانە بارلىق مۇددەلى تاراپتاردى وسىنداي وقيعالاردىڭ الدىن الۋ بويىنشا پراكتيكالىق شارالار ازىرلەۋگە شاقىردى. ۆەدومستۆو تەك حالىقارالىق قۇقىق نورمالارىن قاتاڭ ساقتاۋ عانا مۇنداي جاعدايلاردىڭ قايتالانۋىنا جول بەرمەيتىنىن اتاپ ءوتتى.
"قازىرگى ۋاقىتتا قازاقستان رەسپۋبليكاسى كەلتىرىلگەن زالالدى جان-جاقتى باعالاۋدى جۇرگىزىپ جاتىر. ونىڭ قورىتىندىسى بويىنشا قازاقستان حالىقارالىق قۇقىقتا كوزدەلگەن ءوز زاڭدى مۇددەلەرىن قورعاۋدىڭ بارلىق تەتىكتەرىن، ونىڭ ىشىندە كەلتىرىلگەن زالالدى وتەۋ تۋرالى تالاپتار قويۋدى قولدانۋ قۇقىعىن وزىندە ساقتاپ قالادى"، – دەدى سىم-دە.
مينيسترلىك سونداي-اق قازاقستاننىڭ جانجالداردى بەيبىت جولمەن رەتتەۋگە، حالىقارالىق قۇقىق قاعيداتتارىنا، كەمە ءجۇزۋ ەركىندىگىنە جانە حالىقارالىق كولىك-لوگيستيكالىق جانە ەنەرگەتيكالىق باعىتتاردىڭ سەنىمدى جۇمىس ىستەۋىن قامتاماسىز ەتۋگە ادالدىعىن راستادى.
بۇعان دەيىن 19 شىلدەدە كاسپي قۇبىر كونسورسيۋمى تەڭىز تەرمينالىنىڭ ۆپۋ-1 جانە ۆپۋ-3 سىرتقى ايلاق قۇرىلعىلارىندا مۇناي تيەۋ كەزىندە ەكى مۇناي تانكەرى ۇشقىشسىز ۇشاق شابۋىلىنا ۇشىراعانى حابارلاندى. سونداي-اق 17 شىلدەدە كتك تەرمينالىنا قازاقستاندىق مۇنايدى تيەۋ ءۇشىن بارعان Nordic Zenith مۇناي تانكەرى دە ۇشقىشسىز ۇشاق سوققىسىنا ۇشىرادى.