التى ماچتا التى جەڭىس — قازاقستاندىق تەننيسشىلەر جاپونيادا ءوتىپ جاتقان XX جازعى ازيا ويىندارىنىڭ تەننيس تۋرنيرىندەگى ءبىرىنشى ويىن كۇنىن وسىنداي ناتيجەمەن اياقتادى. كورتقا شىققان ەل وكىلدەرىنىڭ بارلىعى دا جەڭىسكە جەتتى، دەپ حابارلايدى infohub.kz سايتى.
ازيادا-2026 جۇلدەلەرى ءۇشىن قازاقستان قۇراماسى ساپىندا اننا دانيلينا، يۋليا پۋتينسەۆا، سونيا جيەنباەۆا، جىبەك قۇلامباەۆا، الەكساندر شەۆچەنكو، تيموفەي سكاتوۆ، دەنيس ەۆسەيەۆ جانە بەيبىت جۇقايەۆ سىنعا تۇسۋدە. دانيلينا، پۋتينسەۆا، قۇلامباەۆا مەن جيەنباەۆا جاپونياعا قىتايدان كەلدى، ول جاقتا ۇلتتىق قۇراما ساپىندا بيللي دجين كينگ كۋبوگىندا ونەر كورسەتكەن بولاتىن.
ايەلدەر اراسىنداعى جەكەلەي سىندا 1/16 فينال كەزەڭىندە سونيا جيەنباەۆا (قازاقستان، رەيتينگتە 384-ورىن) گونكونگتىق اديتيا كارۋناراتنەنى (519) 6:1، 7:5 ەسەبىمەن ۇتتى. يۋليا پۋتينسەۆا (79) پاكىستاندىق ۋشنا سۋحايلگە ءبىر گەيم دە بەرمەدى — 6:1، 6:0.
ەرلەر اراسىنداعى جۇپتىق سىندا 1/16 فينالدا الەكساندر شەۆچەنكو مەن تيموفەي سكاتوۆ گونكونگتىق دجەك چەنگ / سين حانگتام جۇبىنان باسىم ءتۇستى — 6:3، 6:2. دەنيس ەۆسەيەۆ (546) پەن بەيبىت جۇقايەۆ (1494) تا گونكونگ وكىلدەرى سيۋ چيچەنگ پەن سيفۋ ۆونگتى (786) ۇتتى — 6:1، 6:3.
ميكستە سول كەزەڭدە جىبەك قۇلامباەۆا (105) مەن بەيبىت جۇقايەۆ (1494) پاكىستاندىق ۋشنا سۋحايل / اكيل حان جۇبىنان (1834) باسىم بولدى — 6:2، 6:1. اننا دانيلينا (6) مەن الەكساندر شەۆچەنكو پاكىستاننان كەلگەن ماحين افتاب كۋرەشي مەن ايسام كۋرەشيدى جەڭدى — 6:3، 7:5.
ءبىر قىزىعى، قازاقستاننىڭ ازيا ويىندارىنداعى تەننيس جۇلدەلەرى ونشا كوپ ەمەس. ناگويادا بۇل جاعدايدى تۇزەتۋ قاجەت.
XX جازعى ازيا ويىندارى رەسمي تۇردە 19 قىركۇيەكتە اشىلدى جانە 4 قازاندا مارەسىنە جەتەدى. 45 ەلدىڭ سپورتشىلارى قاتىساتىن جارىستا 460 كومپلەكت جۇلدە ساراپقا سالىنۋدا. ازيادا-2026-دا قازاقستان قۇراماسى ساپىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيونى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين، التىنشىنى — ونىڭ ارالاس جەكپە-جەكتەگى كوماندالاسى قادىربەك شىنبايەۆ سالدى. 23 قىركۇيەكتە لۋسەنكو ازيا ويىندارى-2026-نىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى 24 قىركۇيەكتە ەرلەر اراسىنداعى جۇپ ەسكەكتى قايىق جارىسىندا ۆلاديسلاۆ ياكوۆليەۆ پەن يۆان چەرنۋحين جەڭىپ الدى. ياسمينا توقسانباەۆا بۇگىن مارافوندىق جۇرىستە توعىزىنشى التىندى ۇتىپ الدى. ونىنشى التىن مەدالدى شپاگامەن سەمسەرلەسۋشىلەرىمىزدىڭ كومانداسى يەلەندى.
ويىنداردىڭ جەتى كۇنىنەن كەيىن قازاقستان بەيرەسمي مەدال ەسەبىندە بەسىنشى ورىندا تۇردى.