قازاقستاندا جاراقات كەزىندە كومەك كورسەتۋ جۇيەسى كەڭەيتىلۋدە. دەنساۋلىق ساقتاۋ مينيسترلىگىنىڭ باعدارلاماسى وڭىرلەردە تراۆماتولوگيالىق ورتالىقتار جەلىسىن كەڭەيتۋدى جانە تراسسالار مەن تۋريستىك ايماقتاردا شۇعىل كومەكتى كۇشەيتۋدى كوزدەيدى، دەپ حابارلايدى infohub.kz سايتى.
مينيسترلىكتىڭ مالىمەتىنشە، ەلدە تراۆماتولوگيالىق ورتالىقتار جەلىسىن 2027 جىلعا دەيىن قۇرۋ جوسپارلانۋدا، سونداي-اق شوكقا قارسى بولىمشەلەردى جاڭارتۋ كوزدەلۋدە.
مۇنداي ورتالىقتار استانا، الماتى، قاراعاندى جانە بالقاش قالالارىندا اشىلعان. ەندى جەلىنى كەڭەيتۋ تۋرالى شەشىم قابىلداندى.
سونىمەن قاتار، قابىلداۋ بولىمشەلەرىندەگى 210 شوكقا قارسى كابينەتتى زاماناۋي Trauma room-عا قايتا جاراقتاندىرۋ، اۆتوجولداردىڭ ءقاۋىپتى ۋچاسكەلەرىندە 69 تىرەك مەديسينالىق پۋنكتىن جانە تۋريستىك ايماقتاردا 60 ماۋسىمدىق مەديسينالىق پۋنكت قۇرۋ جوسپارلانۋدا.
«جول-كولىك، تۇرمىستىق جانە بالالار جاراقاتتانۋىنىڭ الدىن الۋ جۇمىستارى كۇشەيتىلەدى، سونداي-اق حالىققا العاشقى كومەك كورسەتۋ داعدىلارىن ۇيرەتۋ كەڭەيتىلەدى»، – دەلىنگەن حابارلامادا.
قازىرگى ۋاقىتتا مامانداندىرىلعان كومەكتى 1،5 مىڭنان استام تراۆماتولوگ-دارىگەر كورسەتەدى. رەسپۋبليكادا 81 تراۆمپۋنكت، 4 مىڭنان استام مامانداندىرىلعان توسەك-ورىن جانە 260 مەديسينالىق ۇيىم جۇمىس ىستەيدى.
بۇعان دەيىن «كۋرسيۆ» استانادا جاڭا بالالار تراۆمپۋنكتى اشىلعاننان بەرى مىڭداعان پاسيەنت قابىلداعانىن جازعان بولاتىن. اعىمداعى جىلدىڭ اقپان ايىندا اشىلعاننان كەيىن بەس اي ىشىندە مۇندا 6 740 كىشكەنتاي پاسيەنت قابىلداندى.
ودان بۇرىن الماتىدا كانيكۋل كەزىندە بەلسەندى دەمالىسقا بايلانىستى بالالار جاراقاتىنىڭ كوبەيەتىنى حابارلانعان. بالالار شۇعىل مەديسينالىق كومەك ورتالىعىنىڭ تراۆماتولوگ-ورتوپەدى باقىت قوجاحانوۆتىڭ ايتۋىنشا، ول جۇمىس ىستەيتىن تراۆمپۋنكتكە كۇن سايىن ءارتۇرلى جاراقاتپەن 300-گە دەيىن بالا جۇگىنەدى.