2026 جىلدىڭ ءبىرىنشى جارتىجىلدىعىندا قازاقستاندا تۋا بىتكەن اقاۋىمەن دۇنيەگە كەلگەن بالالار سانى 25،6%-عا ازايدى. دەنساۋلىق ساقتاۋ مينيسترلىگى بۇل وڭ وزگەرىستى پرەناتالدىق سكرينينگتىڭ دامۋىمەن بايلانىستىرىپ وتىر، دەپ حابارلايدى infohub.kz سايتى.
مينيسترلىكتىڭ مالىمەتىنشە، بۇگىندە ەلىمىزدە پەريناتالدىق ورتالىقتار بازاسىندا 22 «ءبىر كۇندىك كلينيكا» جۇمىس ىستەيدى. اعىمداعى جىلدىڭ التى ايىندا ولاردا 66 مىڭ جۇكتى ايەل العاشقى سكرينينگتەن ءوتتى.
«مۇنداي فورمات تاۋەكەلدەردى ۋاقىتىلى انىقتاۋعا جانە قاجەت بولعان جاعدايدا بولاشاق انالاردى قوسىمشا تەكسەرۋگە جىبەرۋگە مۇمكىندىك بەرەدى»، – دەيدى ۆەدومستۆو وكىلدەرى.
ەسەپتى كەزەڭدە ۋلترادىبىستىق زەرتتەۋ كەزىندە ۇرىقتىڭ تۋا بىتكەن اقاۋلارىن انىقتاۋ 13،8%-عا ءوستى، ال تۋا بىتكەن اقاۋلارمەن جانە حروموسومالىق بۇزىلىستارمەن تۋعان بالالار سانى 25،6%-عا قىسقاردى.
دەنساۋلىق ساقتاۋ مينيسترلىگىنىڭ باس گەنەتيگى گۇلشارا ءابىلدينوۆانىڭ ايتۋىنشا، وڭ ديناميكا جۇرگىزىلگەن پرەناتالدىق دياگنوستيكانىڭ ناتيجەلەرى بويىنشا بايقالادى.
«ءبىر كۇن ىشىندە جۇكتى ايەل بيوحيميالىق پرەناتالدىق سكرينينگتەن ءوتىپ، داۋن سيندرومىنا كۇدىك تۋدىراتىن زاتتاردىڭ كونسەنتراسياسىن انىقتاي الادى. سول كۇنى ول ۋدز-دان ءوتىپ، گەنەتيك دارىگەردىڭ كەڭەسىن الادى»، – دەپ ءتۇسىندىردى پروفەسسور.
جوعارى نەمەسە شەكتى تاۋەكەل انىقتالسا، جۇكتى ايەلگە ءينۆازيۆتى پرەناتالدىق دياگنوستيكادان ءوتۋ ۇسىنىلادى.
دەنساۋلىق ساقتاۋ مينيسترلىگى قازاقستاننىڭ «ءبىر كۇندىك كلينيكالاردى» دامىتۋ تاجىريبەسى ورتالىق ازيا ەلدەرىندە جوعارى باعالانعانىن اتاپ ءوتتى. ەندى قىرعىزستان، وزبەكستان جانە تاجىكستان وسى ادىستەمەنى ءوز ەلدەرىندە ەنگىزۋدى جوسپارلاپ وتىر.
بۇعان دەيىن دەنساۋلىق ساقتاۋ مينيسترلىگى رەسپۋبليكاداعى پەرزەنتحانالارداعى تەكسەرۋ قورىتىندىسىن شىعارعان بولاتىن. كوپشىلىگىندە زاڭبۇزۋشىلىقتار انىقتالدى.