قازاقستان ۇلتتىق بانكى قازاقستاندىقتارعا قىتايدا، ءۇندىستاندا، بىرىككەن اراب امىرلىكتەرىندە جانە تاعى باسقا ءبىرقاتار مەملەكەتتە QR-كود ارقىلى ترانسشەكارالىق تولەم جاساۋ مۇمكىندىگىن ىسكە قوسۋعا دايىندالىپ جاتىر. رەتتەۋشىنىڭ جوسپارى بويىنشا، بۇل ەلدەردە بانك قوسىمشالارى ارقىلى تاۋار مەن قىزمەت ءۇشىن تولەۋ مۇمكىندىگى 2027 جىلدىڭ ورتاسىنا دەيىن پايدا بولادى، دەپ حابارلايدى infohub.kz سايتى.
بۇل تۋرالى Central Asia Fintech Summit 2026 فورۋمىندا ۇلتتىق بانك ءتوراعاسىنىڭ ورىنباسارى بينۋر جالەنوۆ ايتتى. ونىڭ ايتۋىنشا، رەتتەۋشى قازاقستاندىقتار ءۇشىن بانك قوسىمشالارى ارقىلى ترانسشەكارالىق تولەمدەردى ازىرلەۋدى جالعاستىرىپ كەلەدى.
«بۇگىندە ءبىرقاتار باعىت بويىنشا ناقتى پراكتيكالىق كەلىسىمدەرگە قول قويىلدى. ءبىز ترانسشەكارالىق تولەمدەردى پىسىقتاپ جاتقان 11 ەلىمىز بار. ولار — جۇڭگو، ءۇندىستان، بىرىككەن اراب امىرلىكتەرى، قىرعىزستان، وزبەكستان جانە باسقا دا مەملەكەتتەر. جىل سوڭىنا دەيىن جۇڭگو باعىتى بويىنشا جۇيە ءىس جۇزىندە جۇمىس ىستەي باستايدى دەپ كۇتەمىز. قالعان ەلدەرمەن ىسكە قوسۋ كەزەڭ-كەزەڭىمەن جۇرەدى، شامامەن كەلەسى جىلدىڭ ورتاسىندا باستالادى»، – دەدى جالەنوۆ.
ۇلتتىق بانك باسشىسىنىڭ ورىنباسارى تۇسىندىرگەندەي، قول جەتكىزىلگەن كەلىسىمدەر قازاقستاندىقتارعا شەتەلدە تاۋار مەن قىزمەت ءۇشىن ءوز بانكىنىڭ قوسىمشاسىنان QR-كودتى سكانەرلەپ قانا تولەۋگە مۇمكىندىك بەرەدى. سونىمەن قاتار ءوز كودىن جاساۋ مۇمكىندىگى پايدا بولادى، وسىلايشا بۇل ەلدەردىڭ تۇرعىندارى قازاقستاندىقتارعا اقشا اۋدارا الادى.
جالەنوۆتىڭ ايتۋىنشا، مۇنداي وپەراسيالار ءۇشىن كوميسسيانى تولەم جۇرگىزىلەتىن بانكتىڭ ءوزى بەلگىلەيدى.
ۇلتتىق بانك ءتوراعاسىنىڭ ورىنباسارى سونداي-اق بارلىق ساۋدا نۇكتەسى ءبىرىڭعاي QR ارقىلى تولەۋگە ارنالعان ستاتيكالىق جاپسىرما كودتاردى ءالى اۋىستىرىپ ۇلگەرمەگەنىن حابارلادى. ال تەرمينال ارقىلى مۇنداي تولەمدى قابىلداۋدان باس تارتۋ — زاڭ بۇزۋشىلىق.