قازاقستاندا كەيبىر اۋرۋلاردىڭ بولۋى جۇرگىزۋشى كۋالىگىنىڭ قولدانىلۋىن توقتاتۋعا نەگىز بولۋى مۇمكىن. الايدا دياگنوزدىڭ ءوزى كولىك جۇرگىزۋگە اۆتوماتتى تۇردە تىيىم سالمايدى. مەديسينالىق قارسى كورسەتىلىمدەر تىزبەسى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ №853 بۇيرىعىمەن بەكىتىلگەن. ولار تۋرالى مالىمەتتەر ىشكى ىستەر ورگاندارىنا جىبەرىلەدى، ال كۋالىكتىڭ قولدانىلۋىن توقتاتۋ تۋرالى تۇپكىلىكتى شەشىمدى سوت قابىلدايدى، دەپ حابارلايدى infohub.kz سايتى.
ءابسوليۋتتى قارسى كورسەتىلىمدەر قاتارىنا كەيبىر اۋىر پسيحيكالىق بۇزىلىستار، ەپيلەپسيا، احروماتوپسيا جانە ەكى كوزدىڭ سوقىرلىعى ەنگىزىلگەن. تىزبەگە سونداي-اق شيزوفرەنيا، شيزوتيپتىك جانە ساندىراقتىق بۇزىلىستار، اۋىر نەمەسە ءجيى اسقىناتىن كورىنىستەرى بار جەكەلەگەن سوزىلمالى پسيحيكالىق بۇزىلىستار، سونداي-اق رەميسسيا مەرزىمى ەكى جىلدان از بولعان كەزدە پسيحواكتيۆتى زاتتاردى قولدانۋعا بايلانىستى بۇزىلىستار كىرگىزىلگەن.
كەيبىر جاعدايلاردا ادام ارنايى جابدىقتى پايدالانىپ نەمەسە بەلگىلى ءبىر شارتتاردا كولىك جۇرگىزۋدى جالعاستىرا الادى. مىسالى، اياق-قول قىزمەتى بۇزىلعاندا قولمەن باسقارىلاتىن كولىككە رۇقسات ەتىلەدى. كەيبىر كورۋ قابىلەتىنىڭ بۇزىلىستارىندا كوزىلدىرىك نەمەسە كونتاكتىلى لينزامەن جۇرگىزۋگە رۇقسات بەرىلەدى، ال ەستۋ قابىلەتى بۇزىلعاندا ەستۋ اپپاراتىن نەمەسە باسقا تۇزەتۋ قۇرالىن قولدانۋعا جول اشىلادى.
تالاپتار كولىك قۇرالىنىڭ ساناتىنا قاراي وزگەشەلەنەدى. جەڭىل جانە جۇك اۆتوموبيلدەرى، اۆتوبۋستار مەن باسقا دا ساناتتار ءۇشىن شارتتار بولەك: ماسەلەن، C، CE، D، DE، C1، D1 جانە تاعى باسقا ساناتتارعا كورۋ قابىلەتىنە قاتىستى نەعۇرلىم قاتاڭ تالاپتار قويىلعان. اتاپ ايتقاندا، ءبىر كوزدىڭ سوقىرلىعى مۇنداي جۇرگىزۋشىلەر ءۇشىن قارسى كورسەتىلىم سانالادى. ۆەستيبۋليارلىق اپپارات اۋرۋلارىندا، كورۋ قابىلەتىنىڭ ايقىن بۇزىلىستارىندا، جۇيكە جۇيەسى زاقىمدانۋىنىڭ كەيبىر سالدارلارىندا، ەستۋ قابىلەتىنىڭ بۇزىلىستارىندا جانە تىرەك-قيمىل اپپاراتىنىڭ ماسەلەلەرىندە جەكەلەگەن شەكتەۋلەر قاراستىرىلعان.
دەنساۋلىق ساقتاۋ مينيسترلىگىنىڭ دەرەگىنشە، 2026 جىلدىڭ باسىنان بەرى كولىك جۇرگىزۋ مۇمكىندىگىنە اسەر ەتۋى مۇمكىن مەديسينالىق وزگەرىستەر 21 مىڭنان استام جۇرگىزۋشىدەن انىقتالعان. 13 مىڭنان استام ادامعا قاتىستى پوليسەيلەر سوتقا تالاپ-ارىز جولداعان. كۇشىنە ەنگەن شەشىمدەر بويىنشا 7،4 مىڭعا جۋىق كۋالىكتىڭ قولدانىلۋى توقتاتىلعان.
دەنساۋلىق ساقتاۋ مينيسترلىگىندە تەك دياگنوزدىڭ بولۋىنا بايلانىستى قۇقىق اۆتوماتتى تۇردە توقتاتىلمايتىنىن بولەك اتاپ ءوتتى. دەنساۋلىق جاعدايى مەديسينالىق قارسى كورسەتىلىمدەر تىزبەسىنە كىرىپ، كولىك جۇرگىزۋ قاۋىپسىزدىگىنە اسەر ەتۋى مۇمكىن بولسا عانا شەكتەۋ قويۋعا جول بەرىلەدى.
بۇعان دەيىن كۋرسيۆ اۆتو قازاقستاندا جۇرگىزۋشى كۋالىگىنە ەمتيحاندى جەكەمەنشىك اۆتودرومداردا تاپسىرۋ ۇسىنىلعانىن حابارلاعان.