ماڭعىستاۋ وبلىسىندا قازا تاپقان اسكەري قىزمەتشىلەرگە بايلانىستى قازاقستان جالپىۇلتتىق ازا تۇتۋعا بەلشەسىنەن باتتى. ەلدەگى مادەني ءومىر دە توقتاپ قالدى: ۇيىمداستىرۋشىلار مەن ارتىستەر وسى كۇنگە جوسپارلانعان شوۋ، كونسەرت جانە سپەكتاكلدەردى جاپپاي كەيىنگە شەگەرىپ جاتىر، دەپ حابارلايدى infohub.kz سايتى.
مۋزىكانتتار، كونسەرتتىك توپتار، گالەرەيالار مەن جەتەكشى تەاترلار بىرىنەن سوڭ ءبىرى گاسترولدىك كەستەلەرىندەگى وزگەرىستەر تۋرالى ايتىپ جاتىر.
ماسەلەن، 25 قىركۇيەككە جوسپارلانعان، مايكل دجەكسون شىعارماشىلىعىنا ارنالعان الەمدىك تريبيۋت-شوۋ وتەتىن الماتىداعى كونسەرت 28 قىركۇيەككە اۋىستىرىلدى. ال وسىعان ۇقساس شوۋ 26 قىركۇيەكتە وزگەرىسسىز وتەدى.
ساحنادا Amre دەگەن ەسىممەن تانىمال قازاقستاندىق ءانشى ەرنار ساديربايەۆ ەلدەگى قايعىلى جاعدايعا بايلانىستى ءوز ونەر كورسەتۋىن توقتاتىپ، بارلىق كونسەرتىن، رەليزىن جانە ءىس-شاراسىن 1 قازانعا دەيىن كەيىنگە شەگەرگەنىن مالىمدەدى.
BI Group كومپانياسىنىڭ 25 قىركۇيەككە Almaty Theatre-تە جوسپارلانعان جوبا تانىستىرىلىمدارى 2 قازانعا اۋىستىرىلدى. كومپانيا بۇعان دەيىن بەرىلگەن بارلىق تىركەۋلەر كۇشىندە قالاتىنىن اتاپ ءوتتى.
سونىمەن قاتار ستەنداپ ءارتىسى ءارى بلوگەر ازات مارات، ياعني Zee دەگەن اتپەن كەڭ تانىمال جان، سەمەيدەگى ونەر كورسەتۋىن 27 قىركۇيەككە شەگەردى. Zee قازا تاپقانداردىڭ بارلىق تۋىستارى مەن جاقىندارىنا كوڭىل ايتتى.
شىمكەنتتە بۇل كۇنى Ne Prosto Orchestra كونسەرتى ءوتۋى ءتيىس ەدى. ءىس-شارا 30 قىركۇيەككە اۋىستىرىلدى.
قازاقستان ەستراداسىنىڭ جاس ءارى تانىمال وكىلى ابزال ۋتەشوۆ تە استاناداعى كونسەرتىنىڭ كەيىنگە شەگەرىلگەنىن حابارلادى. ءىس-شارا 29 قىركۇيەكتە وتەدى.
الەۋمەتتىك جەلىلەردە قىزۋ تالقى ءجۇرىپ جاتىر. پايدالانۋشىلار پىكىرلەردە كۇزدەگى باسقا دا ءىرى ءىس-شارالاردى تولىق توقتاتۋدى جانە كەيىنگە شەگەرۋدى تالاپ ەتۋدە. اتاپ ايتقاندا، سادراددين مەن قايرات نۇرتاستىڭ الداعى ۇلكەن كونسەرتتەرى تالقىلانىپ جاتىر. راس، ارتىستەردىڭ كەستەسىندە كۇندەر كەشىرەك تۇر. ءسادرادديننىڭ ستاديوندىق شوۋى 26 جانە 27 قىركۇيەكتە الماتىدا، ال نۇرتاستىڭ مەرەيتويلىق كونسەرتى 27 قىركۇيەكتە استانادا جانە 4 قازاندا الماتىدا جوسپارلانعان.
جاقىن كۇندەرى مادەني شاراعا بارۋدى جوسپارلاعان قازاقستاندىقتارعا ءىس-شارالاردىڭ مارتەبەسىن الدىن الا تەكسەرۋ ۇسىنىلادى. ۇيىمداستىرۋشىلاردىڭ جاڭارتۋلارىن قاداعالاپ، وتكىزىلۋ كۇنى وزگەرمەگەنىن ناقتىلاپ وتىرىڭىز.
ەسكە سالايىق، 24 قىركۇيەكتە كاسپيدە اسكەري-تەڭىز كۇشتەرى وقۋ-جاۋىنگەرلىك مىندەتتەرىن ورىنداپ جاتقاندا، كەنەتتەن شىققان داۋىل مەن ەكپىندى جەلدەن 17 اسكەري قىزمەتشى اشىق تەڭىزگە اعىپ كەتتى. وقيعا سالدارىنان 14 ادام قازا تاپتى.
ساربازداردىڭ قازا بولۋىنا بايلانىستى پرەزيدەنت قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
بۇعان دەيىن «كۋرسيۆ» كاسپيدە وتكەن «حازار قورعانى — 2026» وقۋلارى كەزىندە اسكەري قىزمەتشىلەردىڭ قازا بولۋىنا قاتىستى قورعانىس مينيسترلىگىنىڭ بەس لاۋازىمدى تۇلعاسى ۇستالعانىن جازعان بولاتىن. كۇدىكتىلەردىڭ قاتارىندا قازاقستان اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى جانە جەكە قۇرامدى ءتۇسىرۋ جۇرگىزىلگەن «قايسار» كاتەرىنىڭ كومانديرى بار.