قازاقستاندا باس قارجى ومبۋدسمانى سايلاندى — ول ماريا حادجيەۆا بولدى. ول قوسا اتقارۋشى رەتىندە باعالى قاعازدار نارىعىنداعى قارجى ومبۋدسمانى قىزمەتىن دە اتقارادى، دەپ حابارلايدى infohub.kz سايتى.
قارجى نارىعىن رەتتەۋ جانە دامىتۋ اگەنتتىگىنىڭ ءباسپاسوز قىزمەتى حابارلاعانداي، 30 قىركۇيەكتە قارجى ومبۋدسمانى قىزمەتى كەڭەسىنىڭ وتىرىسىندا باس قارجى ومبۋدسمانى جانە بانك، ميكروقارجى، ساقتاندىرۋ سالالارى مەن باعالى قاعازدار نارىعىنداعى ومبۋدسماندار سايلاندى.
باس قارجى ومبۋدسمانى ءارى باعالى قاعازدار نارىعىنداعى قارجى ومبۋدسمانى بولىپ ماريا جامال قىزى حادجيەۆا سايلاندى. ونىڭ قارجى نارىعىن رەتتەۋ مەن قاداعالاۋدا كوپجىلدىق تاجىريبەسى بار. ادىلەت مينيسترلىگىندە، ۇلتتىق بانكتە جانە قارجىلىق قاداعالاۋ ورگاندارىندا جۇمىس ىستەگەن. 2019–2025 جىلدارى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى قىزمەتىن اتقارعان.
بانك سالاسىنداعى قارجى ومبۋدسمانى بولىپ رۋسلان فارحات ۇلى يبراگيموۆ سايلاندى. ول زاڭ جانە قارجى بىلىمىنە يە، بانك سەكتورىنداعى پروبلەمالىق قارىزدارمەن جۇمىس تاجىريبەسى بار. 2016 جىلدان بەرى بانك ومبۋدسمانى كەڭسەسىندە قىزمەت ەتەدى.
ميكروقارجى سالاسىنداعى قارجى ومبۋدسمانى بولىپ نازگۇل قاراس قىزى ەستەۋسيزوۆا سايلاندى. ول جوعارى ەكونوميكالىق جانە زاڭ بىلىمىنە، زاڭ عىلىمدارىنىڭ ماگيسترى دارەجەسىنە يە. بانك سەكتورىندا جۇمىس ىستەگەن، قازاقستاننىڭ كوللەكتورلار ۇلتتىق پالاتاسىن جانە قارىز الۋشىلاردىڭ قۇقىقتارىن قورعاۋ جونىندەگى الەۋمەتتىك جوبانى باسقارعان. 2024 جىلدىڭ جەلتوقسانىنان باستاپ ميكروقارجى ومبۋدسمانى بولىپ كەلەدى.
ساقتاندىرۋ سالاسىنداعى قارجى ومبۋدسمانى بولىپ قانات تولەگەن ۇلى اليگۋلوۆ سايلاندى. ول ەكونوميكالىق جانە زاڭ بىلىمىنە يە، شىعىنداردى رەتتەۋ جانە ساقتاندىرۋ تولەمدەرى بولىمشەلەرىن باسقارۋ تاجىريبەسى بار. ساقتاندىرۋ كومپانيالارىندا جۇمىس ىستەگەن، ساقتاندىرۋ جاعدايلارىن رەتتەۋدى اۆتوماتتاندىرۋعا جانە سيفرلىق كليەنتتىك سەرۆيستەردى دامىتۋعا قاتىسقان.
«ءبىرىڭعاي قارجى ومبۋدسمانى قىزمەتى 2027 جىلدىڭ 1 قاڭتارىنان باستاپ جۇمىس ىستەي باستايدى. ول قولدانىستاعى بانك، ميكروقارجى جانە ساقتاندىرۋ ومبۋدسماندارى ينستيتۋتتارىن بىرىكتىرىپ، تۇتىنۋشىلاردى قورعاۋ تەتىگىن بروكەرلىك قىزمەتتەرگە دە تاراتادى. قارجى ومبۋدسمانى قىزمەتىنىڭ الدىندا قارجىلىق قىزمەتتەردى تۇتىنۋشىلاردىڭ وتىنىشتەرىن ءتيىمدى قاراۋ، قارجىلىق ونىمدەر بويىنشا تۋىندايتىن داۋلاردى سوتقا دەيىن رەتتەۋ، سونداي-اق جەكە تۇلعالار بولىپ تابىلاتىن قارىز الۋشىلاردىڭ قارىزدارىن ولاردىڭ قارجىلىق مۇمكىندىكتەرىن ەسكەرە وتىرىپ رەتتەۋگە جاردەمدەسۋ مىندەتتەرى تۇر»، — دەلىنگەن حابارلامادا.
اتاپ وتىلگەندەي، قىزمەتتىڭ باسىم باعىتتارى پروسەستەردى سيفرلاندىرۋ، جەكە جانە ۇجىمدىق قارىزدى رەتتەۋدى دامىتۋ، ونىڭ ىشىندە Finkelisim.kz ۇجىمدىق قارىزدى رەتتەۋ پلاتفورماسىن پايدالانۋ، سونداي-اق «قارىزسىز قوعام» جوباسىمەن ءوزارا ءىس-قيمىل جاساۋ بولادى.
سونىمەن قاتار قىزمەتتىڭ ماڭىزدى باعىتى جۇيەلىك پروبلەمالار مەن مىنەز-ق ۇلىقتىق قاداعالاۋ سۋبەكتىلەرىنىڭ قايتالاناتىن تاجىريبەلەرىن انىقتاۋ ءۇشىن كەلىپ تۇسكەن جانە قارالعان وتىنىشتەردى تالداۋ، سونداي-اق قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ تەتىكتەرىن جەتىلدىرۋ جونىندەگى ءتيىستى ۇسىنىستاردى دايىنداۋ بولادى.
قارجىلىق قىزمەتتەردى تۇتىنۋشىلاردىڭ وتىنىشتەرىن قاراۋ تەگىن جۇزەگە اسىرىلادى.
ەسكە سالايىق، 2025 جىلدىڭ قاراشاسىندا قازاقستاندا بانكتەر جانە بانك قىزمەتى تۋرالى زاڭ جوباسى اياسىندا ءبىرىڭعاي قارجى ومبۋدسمانىن ەنگىزۋ قاراستىرىلىپ جاتقانى حابارلانعان بولاتىن.