قازاقستاندا call-ورتالىقتاردان كەلەتىن قوڭىراۋلاردى مىندەتتى تۇردە تاڭبالاۋ ەنگىزىلۋدە. جاڭالىقتىڭ بولجامدى ىسكە قوسىلۋ مەرزىمى بەلگىلى بولدى. بۇل تۋرالى ۇكىمەت بريفينگىندە جاساندى ينتەللەكت جانە سيفرلىق دامۋ مينيسترلىگىنىڭ تەلەكوممۋنيكاسيالار كوميتەتىنىڭ ءتوراعاسى دانيار سەيسەمبەكوۆ ايتتى، دەپ حابارلايدى infohub.kz سايتى.
ونىڭ ايتۋىنشا، call-ورتالىقتاردىڭ قوڭىراۋلارىن مىندەتتى تاڭبالاۋدى كوزدەيتىن زاڭنامالىق تۇزەتۋلەر قابىلدانىپ، ولاردىڭ ءبىرقاتارى كۇشىنە ەندى. قازىرگى تاڭدا مينيسترلىكتە بايلانىس قىزمەتتەرىن كورسەتۋ ەرەجەلەرى ازىرلەنىپ، كەلىسىلۋدە. بۇل ەرەجەلەردە ناقتى تالاپتار بەكىتىلەدى.
«بىزدە call-ورتالىقتاردىڭ قوڭىراۋلارىن مىندەتتى تاڭبالاۋدى تالاپ ەتەتىن زاڭنامالىق تۇزەتۋلەر قابىلداندى. وسى تۇزەتۋلەردىڭ ءبىرقاتارى كۇشىنە ەندى. ءقازىر مينيسترلىگىمىزدە بايلانىس قىزمەتتەرىن كورسەتۋ ەرەجەلەرى ازىرلەنىپ، كەلىسىلۋدە، وندا بەلگىلى ءبىر ەرەجەلەر بەكىتىلەدى. وپەراتورلاردىڭ رەسمي ءوتىنىشى بار. 2027 جىلدىڭ ءبىرىنشى توقسانىنان باستاپ ەنگىزۋدى سۇرادى. (…) بارلىعىنا جەتىلدىرۋ قاجەت، ويتكەنى ولاردىڭ بارلىعى قىزمەت كورسەتەدى، سونىڭ ىشىندە تەلەفونيا دا. سوندىقتان وپەراتورلار وسىنداي وتىنىشپەن جۇگىندى. ءقازىر ەرەجەلەر مەملەكەتتىك ورگانداردا كەلىسىلۋدە. مەنىڭ ويىمشا، قازان ايىنىڭ ورتاسىنا دەيىن ءمينيستردىڭ بۇيرىعىنا قول قويىلادى، وندا مەرزىمدەر دە كورسەتىلەدى»، — دەدى دانيار سەيسەمبەكوۆ.
ەسكە سالايىق، شىلدە ايىندا ينتەرنەتكە قوسىلۋ، IP-تەلەفونيا جانە ترانكينگتىك بايلانىس قىزمەتتەرىن تەك ليسەنزياسى بار وپەراتورلار عانا كورسەتە الاتىنى حابارلانعان بولاتىن. سونىمەن قاتار، الاياقتاردان قورعاۋ ءۇشىن رەسمي تۇلعالاردىڭ قوڭىراۋلارى تاڭبالانادى. زاڭ تامىز ايىنىڭ سوڭىندا كۇشىنە ەندى.